У самалёце, які разбіўся ў Цвярской вобласці, значыўся Прыгожын — Расавіяцыя
Яўген Прыгожын / "Вагнер"
У Расіі разбіўся бізнес-джэт з пасажырамі на борце. Расійскія афіцыйныя СМІ і тэлеграм-каналы паведамілі, што гэта быў самалёт заснавальніка ПВК "Вагнер" Яўгена Прыгожына.
Пазней Расавіяцыя заявіла, што сам Прыгожын значыўся сярод пасажыраў самалёта.
Усе людзі на борце загінулі. Там было сем пасажыраў і тры чальцы экіпажу.
У тг-каналах, звязаных з Прыгожыным, пішуць, быццам самалёт быў збіты расійскімі сродкамі супрацьпаветранай абароны. Гэтую ж версію падтрымліваюць і тыя, хто рэзка крытыкаваў Прыгожына і яго няўдалы "мяцеж".
Сярод пасажыраў быў камандзір ПВК "Вагнер" Дзмітрый Уткін — правая рука Прыгожына.
Пазней стала вядома, што адначасова з самалётам у Цвярской вобласці іншы самалёт Прыгожына ляцеў у Падмаскоўі.
На месцы падзення самалёта Прыгожына / t.me/theothertver
