У расійскім Ангарску загарэўся нафтаперапрацоўчы завод
Пажар на нафтаперапрацоўчым заводзе ў Ангарску / МНС РФ
У расійскім Ангарску (Іркуцкая вобласць) загарэўся нафтаперапрацоўчы завод. Перад пажарам быў выбух. У мясцовым МНС кажуць, што папярэдняй прычынай выбуху была "загазаванасць сістэм тэхналагічнай устаноўкі".
Плошча ўзгарання склала 2,5 тысячы квадратных метраў, кажа Іркуцкі губернатар Ігар Кобзеў. У выніку выбуху і пажару загінулі два чалавекі, яшчэ пяць чалавек пацярпелі. Аднаго пакінулі ў шпіталі, астатніх адправілі на амбулаторнае лячэнне. Расійскія паблікі пішуць, што "ад ударнай хвалі ў суседніх дамах паваліліся столі". Аднак Кобзеў сцвярджае, што ўлады правялі абследаванне ў найбліжэйшых дамах і "пашкоджанняў не выяўлена".
У апошнія тыдні ў Расіі пачасціліся НЗ на прадпрыемствах і гандлёвых аб'ектах: згарэлі два буйныя гандлёвыя цэнтры. Пажар тушылі і на шынным прадпрыемстве ў Барнауле.
