У МЗС Польшчы выклікалі часовага паверанага ў справах Беларусі
8 кастрычніка ў МЗС Польшчы выклікалі часовага паверанага ў справах Беларусі Аляксандра Часноўскага. Прычынай стала сітуацыя на польска-беларускай мяжы і міграцыйны крызіс, паведамляе pap.pl.
Пакуль на мяжы Беларусі з Літвой, Латвіяй "зацішша", мігранты працягваюць намаганні нелегальна трапіць у Польшчу. Штодня польскі бок спыняе і адпраўляе назад каля паўтысячы чалавек.
У пятніцу Памежная служба Польшчы заявіла, што з беларускага боку абстралялі халастымі патронамі польскі патруль. Беларускія памежнікі гэта абвяргаюць.
Часноўскі заявіў, што інфармацыя пра стрэлы "непраўдзівая". Польскі ж бок падкрэслівае, што доказы маюцца і іх могуць прадаставіць і беларускаму боку, і іншым краінам.
