У Мінску з'явяцца зоны, дзе забароняць ездзіць на электрасамакатах
![Часта шэрынгавымі сервісамі карыстаюцца непаўналетнія, а хтосьці катаецца не адзін](/sites/default/files/styles/gallery_main/public/2024-05/5de6978a1ec863c3bdc6e560f0f96233.jpg.webp?itok=bmwvH1SC)
Часта шэрынгавымі сервісамі карыстаюцца непаўналетнія, а хтосьці катаецца не адзін / sb.by
У Мінску з'явяцца зоны, дзе забароняць ездзіць на электрасамакатах. А на некаторых участках таксама абмяжуюць хуткасць. Пра гэта было аб'яўлена па выніках чарговай сустрэчы чыноўнікаў Мінгарвыканкама і аператараў СПМ (сродкаў персанальнай мабільнасці). Абмяркоўваліся пытанні бяспекі (бяспечнага праезду пешаходных зон і скрыжаванняў).
Справа ў тым, што ў сталіцы стала зашмат здарэнняў з удзелам самакатчыкаў (у студзені-красавіку было 8 ДТЗ, а летась за той жа перыяд толькі 1). Часта шэрынгавымі сервісамі карыстаюцца непаўналетнія, хтосьці катаецца не адзін (адна з кампаній нядаўна стала адсочваць такія факты пры дапамозе штучнага інтэлекту). На нарадзе ўздымалася пытанне ўкаранення практыкі блакавання карыстальнікаў, якія парушаюць правілы карыстання СПМ.
Зоны забароны і абмежавання хуткасці будуць вызначацца "пры ўзаемадзеянні адміністрацый раёнаў сталіцы і аператараў СПМ". Будзе ўзмоцнена "тлумачальная праца з установамі адукацыі, законнымі прадстаўнікамі навучэнцаў і непасрэдна навучэнцамі".
![У Мінску з'явяцца зоны, дзе забароняць ездзіць на электрасамакатах](/sites/default/files/styles/default_image_paragraph/public/paragraphs/image/3443.jpg.webp?itok=FbDI21XW)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.