У Мінску затрымалі моцна п'янага кіроўцу газонакасілкі — 3,8 праміле
![У Мінску затрымалі моцна п'янага кіроўцу газонакасілкі — 3,8 праміле](/sites/default/files/styles/gallery_main/public/2023-08/kasilka-1905.jpg.webp?itok=8BzfQvfg)
У Мінску супрацоўнікі ДАІ затрымалі рабочага з 3,8 праміле алкаголю ў крыві, які выехаў на газонакасілцы на дарогу.
"Рабочы касіў траву ў раёне вуліцы Гарэцкага на чатырохколавай газонакасілцы, якая падобная да невялікага трактара. Ён стаў выязджаць на дарогу, каб пераехаць на другі бок, паводзіў сябе відавочна неадэкватна. Яго спынілі супрацоўнікі ДАІ, а ён не можа нічога толкам растлумачыць. Адвезлі на медасведчанне — на перапыненым выдыху прыбор паказаў 3,8 праміле алкаголю", — перадае БЕЛТА словы інспектара аддзела ДАІ Фрунзенскага раёна сталіцы Сяргея Няжуты.
На шчасце, як кажуць у ДАІ, нецвярозая язда на газонакасілцы па дарозе не прывяла да ДТЗ ці іншых здарэнняў.
За кіраванне транспартам у нецвярозым выглядзе мужчыну пазбавяць правоў кіроўцы на ўсе катэгорыі на тры гады. Акрамя таго яму пагражае вялікі штраф.