Вы тут

У Літве не бачаць магчымасці для перамоваў з Беларуссю аб мігрантах

Кіраўнік МУС Літвы Агне Білатайтэ​ / lrt.lt

У Літве не бачыць магчымасці для перамоваў з Беларуссю аб урэгуляванні міграцыйнага крызісу. Пра гэта заявіла ў вячэрнім эфіры нацыянальнага тэлебачання LRT міністр унутраных спраў Рэспублікі Агне Білатайтэ.

"Не ўяўляю сабе, як можна весці нейкія перамовы, палітычныя перамовы з крымінальнымі злачынцамі", — сказала яна.

З Мінскам у цяперашні час магчымыя толькі тэхнічныя кансультацыі ў рамках вырашэння гуманітарнага крызісу. Яна падкрэсліла, што віна за міграцыйны крызіс ляжыць на Аляксандры Лукашэнку. І ён павінен "адказаць за гуманітарны крызіс, за тое, што людзі пакутуюць".

Білатайтэ таксама распавяла, што ў цяперашні час на беларускім баку ля літоўскай мяжы знаходзяцца каля 2 тысяч мігрантаў з краін Азіі і Афрыкі. Паводле яе ацэнкі, "сітуацыя на мяжы стабільная, але напружанасць захоўваецца". І ў Вільні не выключаюць самыя розныя варыянты развіцця падзей — "гатовыя да любых сцэнароў, якія могуць адбыцца, ведаючы непрадказальнасць Лукашэнкі".

З пачатку года на літоўска-беларускай мяжы затрыманыя больш за 4 тысячы нелегальных мігрантаў. Гэта ў 50 разоў больш, чым за ўвесь 2020 год. З аналягічнай праблемай сутыкнулася і Польшча. Сітуацыя на гэтым участку мяжы рэзка абвастрылася 8 лістапада — некалькі тысяч чалавек падышлі да мяжы і разбілі тут лагер. Праз тыдзень, 16 лістапада, яны паспрабавалі сілай прарвацца ў Польшчу, ламалі загароду з калючага дроту і кідалі камяні ў польскіх сілавікоў. Іх стрымалі вадамётамі. У ЕС лічаць, што гэтая сітуацыя створана рэжымам Лукашэнкі. З ім двойчы за апошни час размаўляла канцлер Германіі Ангела Меркель. Але ніякіх дамоўленасцяў аб гуманітарным карыдоры для мігрантаў дасягнута не было, абвяргалі пазней заявы беларускіх уладаў нямецкія чыноўнікі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.