Лукашэнка радуецца, што "прыстойна падрэзалі крылы" беларусам з "картай паляка"
![Жыхары Камянецкага раёна слухаюць Аляксандра Лукашэнку, 1 жніўня 2023-га / president.gov.by](/sites/default/files/styles/gallery_main/public/2023-08/kartap.jpg.webp?itok=iKqJMArg)
Жыхары Камянецкага раёна слухаюць Аляксандра Лукашэнку, 1 жніўня 2023-га / president.gov.by
1 жніўня падчас паездкі ў Камянецкі раён Брэсцкай вобласці Аляксандр Лукашэнка згадаў ўладальнікаў "карты паляка". "Мы яшчэ раз вернемся да гэтай праблемы. Трэба паглядзець, якія наступныя крокі рабіць", — сказаў ён. Адпаведнае даручэнне атрымала Адміністрацыя прэзідэнта.
"Не хочацца пакрыўдзіць і людзей, таму мы робім акуратныя крокі, — працягвае развіваць думку Лукашэнка. — Людзі павінны жыць свабодна на сваёй зямлі, у сваім грамадстве, каб яны выказвалі пазіцыю сваю, нікога не баяліся. У адваротным выпадку навошта такая дзяржава, дзе будуць ціснуць людзей. Вельмі важна не перагнуць палку".
І адначасова ён гаворыць: "Што тычыцца карты паляка, ну мы прыстойна падрэзалі крылы гэтым людзям" і "Трэба ціскануць так, каб гэтых з картай паляка...".
"Карта паляка" — дакумент, які пацвярджае польскае паходжанне чалавека і дае некаторыя неграмадзянскія правы ў Польшчы. Па звестках польскага боку, дакумент на мінулы год атрымалі больш чым 130 тысяч грамадзян Беларусі. Аляксандр Лукашэнка змагаецца з "картай паляка" з моманту яе з'яўлення ў 2007-м, але не вельмі паспяхова. Летась барацьба актывізавалася, а сёлета вядомыя выпадкі, калі сілавікі патрабавалі ад беларусаў здаваць "карты паляка".
Згадаў Лукашэнка і магчымасць пазбаўлення палітычных апанентаў грамадзянства Беларусі. З яго слоў вынікае, што "грамадзянства можна пазбаўляць толькі тых ворагаў, якія змагаюцца супраць нашай краіны". Атрымліваецца, што "ворагам", якія не змагаюцца, гэта не пагражае.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.