У Гомелі і Мазыры асуджаных на "хімію" затрымалі паўторна — за татуіроўкі
![Аднаго з затрыманых паўторна затрымалі за татуіроўку з Пагоняй / Ілюстрацыйнае фота gomelspring.org](/sites/default/files/styles/gallery_main/public/2023-08/pogonja_2_11.jpg.webp?itok=kjOwBHym)
Аднаго з затрыманых паўторна затрымалі за татуіроўку з Пагоняй / Ілюстрацыйнае фота gomelspring.org
У Гомельскай вобласці некалькіх чалавек, асуджаных на "хімію", зноў затрымалі. Цяпер — за татуіроўкі. Пра гэта расказваюць праваабаронцы. У затрыманых былі татуіроўкі з Пагоняй і ангельскай абрэвіятурай.
"Са зноў затрыманымі зняволенымі абыходзіліся не надта мякка: ім заламалі рукі і зацягнулі ў мікрааўтобус", — кажуць праваабаронцы.
Затрыманні прайшлі ў Гомельскай папраўчай установе адкрытага тыпу № 17 і Мазырскай № 21. Уладальнікам татуіровак інкрымінуюць артыкул 19.11 КаАП "распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць".
Гомельскія праваабаронцы кажуць пра "хвалю затрыманняў" у рэгіёне. Надоечы ў Жлобіне, паводле іх звестак, затрымалі інжынера па нармаванні працы на Беларускай чыгунцы Дзяніса Акінфеева. Нагодай зрабіўся каментар, які ён пакінуў у групе "Каратели Беларуси".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.