У Фэйсбуку з'явіўся пост, які мог пакінуць бацька варшаўскага гвалтаўніка

У Фэйсбуку з'явіўся пост, які пакінуў хутчэй за ўсё бацька Дарыяна С. — хлопца, якога падазраюць у згвалтаванні і гібелі беларускі ў Варшаве. Гэта заўважыла выданне MOST.

"Да ўсеагульнага ведама: я нікому не жадаю таго, што здарылася з намі. Для вас гэта сенсацыя, для нас — трагедыя. Я аддаў бы сваё жыццё гэтай дзяўчыне, калі б мог! І я хачу сказаць вам, што мы не кідаем Дарыяна, бо які бацька ў бядзе пакідае сваё дзіця. Для вас ён пачвара, а для мяне ён сын, і калі я думаю пра тое, што ён нарабіў і што ён усё жыццё будзе за кратамі, я гэтага не прымаю", — гаворыцца ў допісе.

Карыстальнік папрасіў пакінуць яго ў спакоі. Ён заявіў, што ўся выказаная нянавісць не мае нічога агульнага з чалавечнасцю. "Ваша нянавісць — гэта толькі візітная картка таго, якія вы людзі", — падкрэсліў ён.

Беларуску Лізавету згвалтавалі і спрабавалі задушыць у цэнтры Варшавы зранку 25 лютага. Злачынца затрымалі праз некалькі гадзін, яму пагражае пажыццёвае зняволенне.

Пацярпелая дзяўчына некалькі дзён правяла ў рэанімацыі, аднак лекарам так і не ўдалося выратаваць ёй жыццё: 1 сакавіка Лізавета памёрла. Дзяўчыну пахаваюць у Варшаве.

6 сакавіка ў Варшаве адбудзецца марш у памяць пра загінулую беларуску.