У Еўрасаюзе думаюць, як адмяніць роўмінг для беларусаў
Магчымасць для гэтага ёсць, але праект адмены роўмінгу будзе рэалізаваны не раней за 2020 год.
Еўрасаюз разглядае магчымасць панізіць роўмінгавыя тарыфы для шасці краінаў Усходняга партнёрства: Беларусі, Грузіі, Арменіі, Азербайджана, Малдовы і Украіны. Гэтая ініцыятыва з'явілася пасля поўнай адмены роўмінгу паміж краінамі ЕС у чэрвені — зараз для еўрапейцаў сувязь у іншых краінах каштуе столькі ж, як і ў "хатняга аператара".
"Калі вы з грузінскім нумарам паедзеце ў Бельгію, дык не павінны там траціць на званкі больш, чым траціце ў Грузіі", — цытуе TUT.by Барыса Ярашэвіча, кіраўніка падраздзялення Еўрапейскай службы знешніх спраў, якая працуе з Усходнім партнёрствам, рэгіянальным супрацоўніцтвам і АБСЕ.
Адмена роўмінгавых плацяжоў для краінаў Усходняга партнёрства — гэта толькі праект. "Спатрэбіцца час, каб ажыццявіць яго, калі гэта ўвогуле адбудзецца", — адзначае чыноўнік.
Нават калі ўсё атрымаецца, роўмінг будзе адменены не раней за 2020 год.
Магчымыя і іншыя крокі. Напрыклад, гарманізацыя тарыфаў пры захаванні роўмінга ці ўзаемныя саступкі ў коштах на сувязь у межах шасці краінаў Усходняга партнёрства.
Дарэчы, Беларусь зараз рухаецца да адмены роўмінгу з Расіяй. Ідэю ўхвалілі Аляксандр Лукашэнка і спікер Савета федэрацыі РФ Валянціна Матвіенка. У Дзярждуму Расіі ў ліпені ўнесены адпаведны законапраект.