У дзяржынскай бальніцы 8 сакавіка памерлі парадзіха і дзіця
Доктар, ілюстрацыйнае фота
Звесткі пра смерць маці і немаўляці ў Дзяржынскай цэнтральнай раённай бальніцы з'явіліся ў сацсетках 9 сакавіка.
"Учора, 8 сакавіка, адышлі воды, павезлі ў бальніцу і не выратавалі ні парадзіху, ні дачку", — напісала ў сацсетках дзяўчына, якая назвалася калегай загінулай жанчыны.
Аўтарка паста дадала, што загінулая нядаўна выйшла замуж, ёй было 26 гадоў. Пара чакала дзяўчынку — сваё першае дзіця.
Месяц таму дзяўчына пайшла на бальнічны па цяжарнасці. Тэрмін цяжарнасці складаў 34 тыдні. У клініцы ў яе здарыўся анафілактычны шок, дактары не здолелі выратаваць.
"Даведаліся ад яе мамы, якая сёння зранку зайшла да нас у кабінет у істэрыцы даведацца, якія дакументы трэба сабраць", — дадала калега.
Журналісты выдання Onliner звязаліся з галоўнай лекаркай Дзяржынскай ЦРБ Аленай Падалянчык. Яна пацвердзіла гібель маці і немаўляці: "Пакуль толькі скажу: медыкі зрабілі ўсё, што маглі. Гэта я кажу з усёй адказнасцю: усё, што змаглі".
Афіцыйных звестак аб прычынах трагедыі пакуль няма.
