У дзіцячым цэнтры "Зубраня" на Нарачы захварэлі каля 100 дзяцей
![У дзіцячым цэнтры "Зубраня" на Нарачы захварэлі каля 100 дзяцей](/sites/default/files/styles/gallery_main/public/2023-08/liekar-0603.jpg.webp?itok=9amXiEZL)
Каля 100 дзяцей з аднаго заезду захварэлі ў дзіцячым адукацыйна-аздараўленчым цэнтры "Зубраня" каля возера Нарач. Дактары кажуць пра сезонны ўздым ВРВІ і запэўніваюць, што сітуацыя пад кантролем.
Чарговы заезд у "Зубраня" адбыўся 24 лютага. І ў гэты ж дзень да медыкаў з павышанай тэмпературай звярнулася першае дзіця.
Дырэктарка цэнтра Надзея Ануфрыева ў каментары парталу TUT.by адзначыла, што такога ўздыму ВРВІ ў іх яшчэ не было, хаця ў лютым-сакавіку заўсёды фіксуецца сезонны ўздым захворвання.
Аднак цяпер адсотак дзяцей, якія паправіліся, у разы перавышае колькасць тых, хто захварэў. Пік захворвання прыпаў на 4 сакавіка. Аднак ужо 6 сакавіка выпісалі 29 чалавек, а ў медчастку паклалі пяцярых.
"Чаму так шмат тых, хто захварэў? Дзяцей шпіталізавалі, нават калі ў іх няма павышанай тэмпературы, а ёсць толькі недамаганне. Усё гэта — каб не заражаць іншых", — тлумачыць дырэктарка.
Па яе словах, шмат якія дзеці былі не прышчэпленыя ад грыпу, таму захворвалі самі і перадавалі інфекцыю іншым. Так, у адным з атрадаў захварэлае дзіця заразіла 21 чалавека.
У "Зубраняці" часова адмянілі масавыя мерапрыемствы: іх цяпер ладзяць толькі ў атрадах.
Сярод выхавальнікаў, кухонных работнікаў, настаўнікаў, тэхнічнага персаналу на бальнічных знаходзяцца адзінкі, запэўнівае дырэктарка цэнтра. Пры гэтым у іх — розныя захворванні.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.