У Бярозе за ўдзел у пратэстах у 2020-м асудзілі чатырох чалавек
![Сяргей Гоўша і Аляксандр Малькоў](/sites/default/files/styles/gallery_main/public/2024-08/2233_1.jpg.webp?itok=o9ioRUVk)
Сяргей Гоўша і Аляксандр Малькоў / t.me/viasna96/
У Бярозе ў Брэсцкай вобласці за ўдзел у пратэстах у 2020-м асудзілі чатырох чалавек. Ім прызначылі ад 1 да 2 гадоў калоніі агульнага рэжыму. Як паведамляюць праваабаронцы, суд Бярозаўскага раёна (суддзя — Дзмітрый Кавалевіч) прызнаў вінаватымі ў "актыўным удзеле ў дзеяннях, што груба парушаюць грамадскі парадак" (ва ўдзеле ў акцыі пратэсту ў ноч з 10 на 11 жніўня 2020 года) чатырох мужчын: Сяргея Скробата, Аляксандра Малькова, Ігара Шыманчыка і Сяргея Гоўшу. Шыманчык асуджаны на адзін год калоніі, Скробат — на адзін год і шэсць месяцаў, Малькоў — на два гады, Гоўша — на два гады калоніі, але канчаткова, з улікам нейкай папярэдняй судзімасці, на тры гады.
Згодна версіі абвінавачвання, мужчыны, "знаходзячыся на вуліцы Леніна ў горадзе Бяроза, дзейнічаючы ў групе асоб, выкрыквалі лозунгі, дэманстравалі палотны бел-чырвона-белага колеру, груба парушаючы грамадскі парадак, наўмысна перашкаджалі руху транспартных сродкаў і нармальнаму функцыянаванню прадпрыемстваў і арганізацый".
У сакавіку сёлета сілавікі правялі затрыманні ў Бярозе за ўдзел у паслявыбарчых акцыях пратэсту ў 2020 годзе. Тады паведамлялася пра затрыманне каля дзесяці чалавек. Вядома, што падчас гэтага "хапуна" за краты трапіў Сяргей Скробат.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.