У Беларусі здабылі юбілейную 130-мільённую тону нафты
У Беларусі здабылі 130-мільённую тону нафты ад пачатку эксплуатацыі радовішчаў на тэрыторыі краіны. Пра гэта паведамляе БЕЛТА са спасылкай на прэс-службу кампаніі "Беларуснафта".
Афіцыйна лічыцца, што запасы нафты ў Беларусі распрацоўваюцца з 1964 года. У той год спярша ў жніўні, а потым у кастрычніку былі атрыманыя першыя прамысловыя прытокі нафты. Адкрытае радовішча атрымала назву Рэчыцкае.
Максімальнай здабычай нафты ў Беларусі быў адзначаны 1975 год. У той год здабылі 7 млн 953 тысячы тон нафты.
У апошнія тры гады штогадовы аб'ём здабычы нафты складае 1 мільён 645 тысяч тон.
Да пачатку гэтага года ў Беларусі было адкрыта 81 радовішча нафты і газакандэнсату. У цяперашні час кампанія "Беларуснафта" вядзе здабычу нафты і газу на 61 радовішчы. Агульны фонд свідравін складае амаль тысячу адзінак. У іх ліку 801 здабываючае.
Фота: БЕЛТА