У Беларусі забаранілі прадаваць 15 відаў еўрапейскіх пральных парашкоў
![У Беларусі забаранілі прадаваць 15 відаў еўрапейскіх пральных парашкоў](/sites/default/files/styles/gallery_main/public/2023-08/pralka-0309.jpg.webp?itok=Ad9cGXMG)
Забарону на ўвоз і продаж некаторых еўрапейскіх пральных парашкоў, геляў, паст і таблетак увялі ў Беларусі. Гэта чэшскія, нямецкія і польскія мыйныя сродкі, паведамляе прэс-служба Камітэта дзяржкантролю.
У КДК заяўляюць, што іх работнікі з Брэсцкай вобласці разам са спецыялістамі Дзяржстандарту правялі экспертызу 16 пазіцый імпартных мыйных сродкаў з дзвюх гандлёвых сетак. Кепскія вынікі паказалі нібыта 15 з узятых на пробу пазіцый. Яны, як кажуць у КДК, не адпавядаюць беларускім стандартам "па паказчыках пенаўтваральнай і мыйнай здольнасці".
У прыватнасці, для парашкоў паказчык мыйнай здольнасці вызначаны не ніжэй за 85%, для геляў — 60%.
Пад забарону трапілі, напрыклад, нямецкія гелі HERR KLEE C. G. COLOR, HERR KLEE C. G. UNIVERSAL. Экспертыза заяўляе, што іх мыйная здольнасць удвая ніжэй за норму, а пенаўтваральная здольнасць таксама не адпавядае стандарту.
"Мыйная здольнасць шасці найменняў чэшскіх, нямецкіх і польскіх парашкоў (ZICO universal, ZICO color, PUROX COLOR, ROBETA "Горная кветка“, WASCHEMEISTER UNIVERSAL, Alpix Color) склала 51,2−80,5%, а польскіх парашкоў Gaska UNIWERSALNY і Gaska DO KOLORU — усяго толькі 5% і 8% адпаведна", — гаворыцца ў паведамленні КДК.
У Беларусі рэгулярна забараняюць увоз і продаж некаторых тавараў. Праўда, звычайна гэтым займаецца Дзяржстандарт, а не Дзяржкантроль.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.