У Асіповічах гаварылі пра падрыхтоўку партызанскага руху на тэрыторыі Беларусі
![Вось такое "народнае апалчэнне" рыхтуецца да вайны з NATO](/sites/default/files/styles/gallery_main/public/2023-09/nap2.jpg.webp?itok=ZbEqmvyr)
Вось такое "народнае апалчэнне" рыхтуецца да вайны з NATO / mlyn.by
У Асіповічах гаварылі пра падрыхтоўку партызанскага руху на тэрыторыі Беларусі. Кіраўнік Магілёўскай вобласці Анатоль Ісачэнка паўдзельнічаў у зборы па тэрытарыяльнай абароне старшынь раённых і гарадскіх выканкамаў, а таксама кіраўнікоў ваенных камісарыятаў. Ён лічыць, што "народнае апалчэнне можа стаць шырокім грамадскім рухам, ядром партызанскага руху на тэрыторыі Беларусі ў выпадку ваеннай агрэсіі". Насамрэч "шырокага руху" не атрымаецца, бо "народнае апалчэнне" ствараецца толькі з лаяльных рэжыму Аляксандра Лукашэнкі людзей.
Мінабароны, якое цытуе словы Ісачэнкі, не ўдакладняе, хто можа напасці на РБ і супраць каго збіраюцца партызаніць "апалчэнцы". Раней удзельнікі "народнага апалчэння" ў Лунінецкім раёне казалі, што рыхтуюцца да вайны з... NATO.
Атрады "народнага апалчэння" ствараюць у Беларусі з 2022 года. Мяркуецца, што ў іх будуць толькі добраахвотнікі (нярэдка былыя міліцыянеры і вайскоўцы), якім давядзецца дапамагаць міліцыі і войску ў змаганні з "дыверсантамі" і "незаконнымі ўзброенымі фармаваннямі". Аднак, улічваючы нязначную колькасць лаяльных рэжыму грамадзян, гэтыя атрады не будуць шматлікія. Міністр абароны Віктар Хрэнін у траўні паабяцаў, што зброю атрымаюць толькі "свае" людзі.
На зборах у Асіповіцкім раёне адзін з атрадаў "народнага апалчэння" адпрацоўваў затрыманне групы не дыверсантаў (імі займалася тэрабарона), а марадзёраў, якія збіраліся абрабаваць вясковую краму і былі ўзброеныя аўтаматамі.
![У Асіповічах гаварылі пра падрыхтоўку партызанскага руху на тэрыторыі Беларусі](/sites/default/files/styles/default_image_paragraph/public/paragraphs/image/24_7.jpg.webp?itok=hwt0tSjZ)
![У Асіповічах гаварылі пра падрыхтоўку партызанскага руху на тэрыторыі Беларусі](/sites/default/files/styles/default_image_paragraph/public/paragraphs/image/22_92.jpg.webp?itok=r6CELyeg)
![У Асіповічах гаварылі пра падрыхтоўку партызанскага руху на тэрыторыі Беларусі](/sites/default/files/styles/default_image_paragraph/public/paragraphs/image/23_22.jpg.webp?itok=MT4B7vjQ)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.