Топ-11 зорак жаночага чэмпіянату свету па футболе, за якіх варта заўзець
![Алекс Морган – самая папулярная футбалістка свету / bettornado.ru](/sites/default/files/styles/gallery_main/public/2023-08/IMG_3729.jpeg.webp?itok=OFFXR6uu)
Алекс Морган – самая папулярная футбалістка свету / bettornado.ru
20 ліпеня ў Аўстраліі і Новай Зеландыі пачаўся дзявяты жаночы чэмпіянат свету па футболе. Еўрарадыё лічыць несправядлівым, што пра зорных футбалістак чамусьці ведаюць менш, чым пра Месі, Мбапэ і Раналду. Таму мы распавядаем вам пра перспектыўных дзяўчат, на якіх робяць стаўку сусветныя спартовыя журналісты і эксперты.
Але спачатку крыху фактаў пра жаночы мундыяль. У ім удзельнічаюць 32 зборныя каманды з Еўропы, Афрыкі, Паўднёвай і Паўночнай Амерыкі, Азіі і Акіяніі.
У фаварытах - футбалісткі зборнай ЗША, дзеючыя пераможцы. Гаіці, Марока, Панама, Філіпіны, В’етнам, Замбія, Ірландыя і Партугалія будуць гуляць упершыню. І хто ведае, можа, яны яшчэ пакажуць добры футбол і стануць адкрыццём турніру!
Сэм Кер, 29 гадоў, Аўстралія
Форвард і ключавы ігрок каманды з Аўстраліі. Яна дэбютавала ў нацыянальнай зборнай у 15 гадоў. Гэта яе чацвёрты чэмпіянат свету, на якім яна забіла 5 галоў (чатыры з іх - у вароты Ямайкі), і другі - у якасці капітана. А ўвогуле ў складзе зборнай яна ў 121 матчы забіла 63 галы. Мінулы сезон дзяўчына правяла ў англійскім “Чэлсі”.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/Sam%20Kerr_Photo%20by%20Brendon%20Thorne_Getty%20Images.jpg.webp?itok=Ghvy4qvP)
Журналісты вядомага амерыканскага спартовага тэлеканала ESPN, якія даўно сочаць за Сэм Кер, завуць яе “гульцом вялікай гульні” і прадбачаць, што яна ў Аўстраліі пакажа шоу, не падобнае ні на адно, што заўзятары бачылі раней.
Ада Хегерберг, 27 гадоў, Нарвегія
Таксама адна з самых яркіх зорак у жаночым еўрапейскім футболе. Апошнія тры гады яна прапусціла праз траўму, а да гэтага пяць гадоў змагалася з федэрацыяй за ўмовы ў жаночай зборнай, і нават адмаўлялася прадстаўляць сваю краіну.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/photo_2023-07-21_17-42-19.jpg.webp?itok=paZkq7zh)
Яна ўладальніца “Залатога мяча-2018”, а з 2013 выступае за французскі “Ліён”. Ада - рэкардсменка па колькасці галоў (59) у жаночай Лізе чэмпіёнаў. Яна рашучы і фізічна моцны нападнік, і чакаюць, што яна ў гэтым мундыялі будзе ззяць.
Алекс Морган, 34 гады, ЗША
Калі Алекс Морган - цяпер яна капітан “USWNT” - упершыню ўвайшла ў жаночую зборную ЗША, ёй далі мянушку “Жарабя” - за энергію і стыль бегу. Гэта яе чацвёрты чэмпіянат свету, два з якіх былі пераможнымі.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/photo_2023-07-21_18-13-25.jpg.webp?itok=lP162uYG)
Алекс лічаць вельмі эфектыўным гульцом - настолькі, што нават тых, хто ў сваіх клубах гуляе на цэнтральных пазіцыях, пераводзяць на флангі. Спартовыя журналісты, якія ставяць на перамогу ЗША ў гэтым чэмпіянаце, кажуць, што ў гэтым выпадку Алекс Морган будзе ў цэнтры падзей.
Аляксандра Поп, 32 гады, Германія
Сяміразовая чэмпіёнка Бундэслігі, гуляе за “Вольфсбург”, алімпійская чэмпіёнка, віцэ-чэмпіёнка Еўра. Яна забіла 62 галы ў 128 міжнародных матчах.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/csm_220821-Alexandra-Popp-Nationalmannschaft_1f8118f416.jpg.webp?itok=ywNQ9slP)
Марта, 37 гадоў, Бразілія
Насуперак сучаснай этыцы, у свеце футбола Марту параўноўваюць з мужчынамі-футбалістамі, чэмпіёнамі, як Раналдзіньё, Рамарыа і Пеле. Яна найлепшы бамбардзір Бразіліі за ўсю гісторыю: забіла 115 галоў у 175 гульнях. І гэта рэкорд і сярод жанчын, і сярод мужчын.
Трэнер зборнай Бразіліі кажа, што Марта - “каралева і ікона”. Гулец клуба “Orlando Pride”, за зборную Бразіліі ў чэмпіянаце свету яна выступае шосты раз. Сама футбалістка кажа, што бягучы турнір будзе яе апошнім мундыялем, і яна марыць прывезці трафей у Бразілію.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/photo_2023-07-21_18-20-14.jpg.webp?itok=AXOBeXw1)
Асісат Ашаала, 28 гадоў, Нігерыя
З 2019 года Асісат гуляе за “Барселону” і ў чэмпіянаце Іспаніі забіла 83 галы ў 89 матчах. Яе лічаць адной з найлепшых нападаючых свету. Каманда Нігерыі толькі аднойчы дайшла да чвэрцьфіналу за ўсю гісторыю ўдзелу з 1991 года. І эксперты лічаць, што калі каманда зараз выступіць паспяхова, то гэта будзе дзякуючы Асісат.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/photo_2023-07-21_18-23-42.jpg.webp?itok=u5OwSmaE)
Хадзіджа Шоў, 26 гадоў, Ямайка
Яна ўдзельнічае ў чэмпіянаце свету пасля бліскучага сезона з “Манчэстэр Сіці” ў жаночай Суперлізе. Хадзіджа забіла 31 гол у 30 гульнях у сезоне 2022-2023 і дапамагла свайму клубу замацавацца ў чацвёрцы лепшых. Акрамя таго, Шоў з'яўляецца лепшым бамбардзірам зборнай Ямайкі за ўсю гісторыю з 56 галамі на рахунку.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/photo_2023-07-21_20-48-50.jpg.webp?itok=pVGt163v)
Алексія Путэльяс, 26 гадоў, Іспанія
Былы трэнер “Барселоны”, дзе Алексія вырасла як футбалістка, казаў: “Калі вы не ведаеце, што рабіць з мячом, аддайце Алексіі. Яна здольная прымаць найлепшыя рашэнні”. Паўабаронца, уладальніца “Залатога мяча”, вярнулася ў футбол пасля траўмы, але з той пары не правяла 90 хвілін ні ў адной гульні. Але Іспанія вельмі разлічвае на яе.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/photo_2023-07-21_18-30-15.jpg.webp?itok=lm4oCOQO)
Лена Абердорф, 21 год, Германія
Яшчэ адзін гулец нямецкага “Вольфсбурга”, баявая паўабаронца ўмее разганяць атакі і лічыцца ўзыходзячай зоркай не толькі нямецкага, але і сусветнага футбола.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/photo_2023-07-21_18-33-01.jpg.webp?itok=OZXEkQH7)
Кіра Уолш, 26 гадоў, Англія
Кіра гуляе за "Барселону", а ў зборнай Англіі яе лічаць клеем, які трымае каманду разам. Яна якар абароны, вельмі тэхнічная футбалістка на піку сваёй кар'еры і фізічнай формы. Яна здольная да творчасці - яе нечаканы пас, з якога Эла Тун забіла пераможны гол у фінале Еўра-2022, здабыў камандзе перамогу над Германіяй.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/photo_2023-07-21_20-53-18.jpg.webp?itok=spJoG5wa)
Перніле Хардэр, 30 гадоў, Данія
Гулец "Баварыя Мюнхен", а ў мінулым - "Чэлсі", зараз - дацкі капітан. Яна вяртаецца ў футбол пасля траўмы і доўгага перапынку, але яна сапраўдны лідар атакі. У 2020 годзе яна была самай дарагой футбалісткай у свеце. Данія з 2007 года ўпершыню ўдзельнічае ў чэмпіянаце свету, і нацыянальная зборная вельмі разлічвае на Перніле.
![Топ-11 зорак жаночага чэмпіянату свету па футболе, за якіх варта заўзець](/sites/default/files/styles/default_image_paragraph/public/paragraphs/image/photo_2023-07-21_20-53-21.jpg.webp?itok=vT2TC5o5)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.