Тайвань губляе хаўруснікаў у супрацьстаянні з Кітаем — #ІхНоравы

Науру ў панядзелак абвясціла пра скасаванне дыпламатычных адносін з Тайванем. Пра гэта і не толькі ў нашым традыцыйным аглядзе міжнародных навін.
 

Тайвань губляе хаўруснікаў

Ціхаакіянская астраўная дзяржава Науру заявіла 15 студзеня, што разрывае дыпламатычныя адносіны з Тайванем і імкнецца аднавіць іх з Кітаем. Гэта адбылося ўсяго праз некалькі дзён пасля таго, як у Тайвані абралі новага прэзідэнта — празаходняга кандыдата Лая Цындэ.

Такім чынам Тайвань страціў аднаго з нямногіх дыпламатычных саюзнікаў у супрацьстаянні з Пекінам.

"Гэтая змена палітыкі з'яўляецца важным першым крокам у прасоўванні наперад у развіцці Науру", — гаворыцца ў заяве мясцовага ўрада.

У прыватнасці, у ёй гаворыцца, што Науру пяройдзе да "прынцыпу аднаго Кітая", паводле якога Тайвань з'яўляецца часткай Кітая і прызнае Пекін урадам краіны.

У МЗС Кітая ўжо віталі крок Науру па разрыве "так званых дыпламатычных сувязей" з Тайванем. І адзначылі, што гэтае рашэнне "яшчэ раз паказвае, што "прынцып аднаго Кітая" — глабальная тэндэнцыя грамадскай думкі”.

У Тайвані на выбарах прэзідэнта атрымаў перамогу празаходні кандыдат Лай Цындэ. Ён выступае за асобную ідэнтычнасць вострава і адхіляе тэрытарыяльныя прэтэнзіі Кітая.

Акрамя таго, Цындэ абяцае захаваць мір у Тайваньскім праліве, які з'яўляецца крыніцай ваеннай напружанасці для дзвюх найбуйнейшых эканомік свету, паабяцаўшы ісці плячо ў плячо з іншымі вялікімі дэмакратыямі.

Раней лідар Кітая Сі Цзіньпін падчас сустрэч з прэзідэнтам ЗША Джо Байдэнам заявіў, што паглынанне яго краінай Тайваня "непазбежнае".
 

Страшная паводка накрыла Рыа-дэ-Жанейра

Моцныя паводкі і апоўзні адбыліся ў Рыа-дэ-Жанэйра, забраўшы жыцці 11 чалавек. Пра гэта паведамляе The Watchers.

Як паведамляецца, наймацнейшыя ападкі абрынуліся на горад, ператварыўшы дарогі ў бурлівыя рэкі. Асабліва пацярпелі паўночныя часткі горада. Паведамляецца аб апоўзнях, утапленнях і пашкоджанні электрычным токам.

У Акары, адным з найбольш пацярпелых раёнаў Рыа-дэ-Жанейра, паводка затапіла падвальныя памяшканні бальніцы і сур'ёзна ўдарыла па мясцовым бізнесе, а на адной з галоўных магістраляў горада ўзровень вады дасягнуў дахаў аўтамабіляў.

Дзясятак аўтобусных ліній спынілі працу, а некалькі станцый метро закрыліся з прычыны затаплення.

Паводле звестак выдання, у некаторых раёнах Рыа-дэ-Жанэйра ўсяго за 24 гадзіны выпала месячная колькасць ападкаў.

Сур'ёзнасць сітуацыі прымусіла ўлады аб'явіць надзвычайнае становішча. Жыхароў заклікаюць заставацца дома і не выходзіць на вуліцу без неабходнасці.
 

Трактарысты паехалі на Берлін!

У Берліне працягваецца акцыя пратэсту фермераў супраць скарачэння сельскагаспадарчых субсідый, якія прыбываюць з усёй краіны са сваёй тэхнікай. Вуліцы нямецкай сталіцы перапоўненыя тысячамі трактароў.

Як паведамляецца, удзельнікі дэманстрацыі пачалі з'язджацца з усёй краіны з вечара нядзелі, 14 студзеня, і працягваюць да гэтага часу.

Агулам чакаецца каля 5 тысяч трактароў і іншай сельскагаспадарчай тэхнікі, а таксама каля 10 тысяч пратэстоўцаў.