Сярод вагнераўцаў, забітых ва Украіне, быў грамадзянін Беларусі
Расія актыўна выкарыстоўвае ў вайне супраць Украіны наймітаў / ria.ru
Сярод вагнераўцаў, забітых ва Украіне, быў, як мінімум, адзін грамадзянін Беларусі. Ён адбываў тэрмін зняволення ў Расіі і быў завербаваны на вайну. Цяпер сястра загінулага не можа атрымаць яго цела, каб пахаваць на радзіме. "Ні пра якія грошы, ні пра якую кампенсацыю гаворка не ідзе", — піша расійская праваабаронца Вольга Раманава.
Па звестках Раманавай, вагнераўцы пачалі вербаваць у расійскіх калоніях грамадзян Беларусі, Узбекістана, Кыргызстана, Азербайджана. Іх вязуць на вайну. Да праваабаронцаў звяртаюцца сваякі зняволеных-замежнікаў, і некаторых удалося "адбіць", вярнуць назад. Верагодна, гэтыя зняволеныя пагадзіліся далучыцца да вагнераўцаў пад прымусам.
Нядаўна СБУ паведаміла, што ва ўкраінскі палон трапіў 22-гадовы беларус, які добраахвотна падпісаў кантракт з прыватнай расійскай ваеннай кампаніяй "Рэдут".
Беларусаў, якія ваююць супраць Украіны, значна менш, чым беларусаў, якія ў розных падраздзяленнях абараняюць Украіну ад расійскіх акупантаў.
