Супраць Вячоркі і Латушкі спецслужбы плануюць правакацыю ў Вільні — BYPOL
Вячорка і Латушка / BYPOL
Супраць дарадцы Святланы Ціханоўскай Франака Вячоркі і кіраўніка Народнага Антыкрызіснага Упраўлення Паўла Латушкі рыхтуецца правакацыя ў Вільні. Пра гэта паведаміла аб'яднанне былых сілавікоў BYPOL.
Паводле іх інфармацыі, сумесная аперацыя спецслужбаў Беларусі і Расіі звязана з правядзеннем канферэнцыі "Новая Беларусь":
"Нашы нямецкія калегі папярэджваюць, што ў адносінах да двух удзельнікаў канферэнцыі Новая Беларусь спецслужбы Расіі і Беларусі плануюць правакацыю. І гэта дакладна не паведамленне аб ілжывым мініраванні будынка канферэнцыі".
Трэцяя канферэнцыя "Новая Беларусь" праходзіць у Вільні 3-4 жніўня. Прадстаўнікі грамадзянскіх ініцыятываў, палітычных структур і экспертнай супольнасці абмяркуюць, як змяніць сітуацыю ў Беларусі.
Падчас і першай, і другой канферэнцыі паступалі паведамленні аб мініраванні.
