Суд у Маскве прыпыніў рашэнне пра пажыццёвую высылку Ідрака Мірзалізадэ

Замаскварэцкі раённы суд Масквы прыпыніў пастанову МУС пра непажаданасць знаходжання ў Расіі стэндапера Ідрака Мірзалізадэ. Пра гэта напісаў яго адвакат Сяргей Бадамшын.

Ідрак Мірзалізадэ — грамадзянін Беларусі, які меў від на жыхарства ў Расіі. З Расіі яго выслалі ў жніўні 2021-га з пажыццёвай забаронай на ўезд за жарт падчас выступу. Комік расказваў, як складана чалавеку з усходняй знешнасцю зняць жыллё ў Маскве, і высмейваў ксенафобію. За гэты жарт яго збілі на вуліцы, потым асудзілі на 10 сутак. 

Пасля гэтага стэндапера выслалі з Расіі з фармулёўкай пра пажыццёвую "непажаданасць" яго прысутнасці ў краіне. "У сваім публічным выступе Ідрак Мірзалізаде дапусціў выразы, якія ўзбуджаюць нянавісць і варожасць у адносінах да асоб рускай нацыянальнасці, якія прыніжаюць іх чалавечую годнасць", — заявілі ў МУС Расіі.

Комік і яго адвакат аспрэчваюць у судзе рашэнне МУС.