Суд стаў на бок мінчука, у кватэру якога уварваўся АМАП

23/07/2019 - 13:57

Суд Партызанскага раёна Мінска 23 ліпеня адмяніў пастанову следчага, які адмовіўся пачынаць крымінальную справу па скарзе мінчука Дзмітрыя Серады. Матэрыяла праверкі будуць накіраваныя начальніку упраўлення Следчага камітэта па Мінску для дадатковай праверкі, інфармуе TUT.by.

Амаль тры гады таму, у жніўні 2016 года, доктар Дзмітрый Серада, яго жонка і трохгадовая дачка прачнуліся ад таго, што ў іх кватэру ўварваліся амапаўцы са зброяй — праз дзверы і акно.

Выявілася, што доктара падазравалі ў хуліганстве — напярэдадні ў міліцыю прыйшла заява, што ў парку бачылі эксгібіцыяніста. Аднак у дзень затрымання стала ясна, што падставаў для затрымання не было: у той дзень мужчына быў з сябрамі на рыбалцы за 80 км ад Мінска.

Тым не менш мужчына два дні сядзеў за кратамі пад вартай. Ніякіх прабачэнняў з боку міліцыі за незаконнае затрыманне ён не дачакаўся.

Пасля таго, як Сераду адпусцілі, ён стаў дамагацца кампенсацыі за несправядлівае затрыманне. Гэтае змаганне доктар працягвае ўжо трэці год, хаця яму адмовілі ўжо і ў пракуратуры, і ў Следчым камітэце.

"За тры гады сем разоў то пачыналі крымінальную справу па факце злоўжывання службовымі паўнамоцтвамі, то адмаўлялі", — кажа Серада. Па яго словах, Генпракуратура заявіла, быццам супрацьпраўных дзеянняў міліцыі не ўстаноўлена.

"За столькі гадоў, пакуль ідзе праверка па маіх скаргах і заявах, назбіралася матэрыялаў на тры тамы. З матэрыялаў справы стала вядома, што пацярпелая дзяўчына, якая жыве па суседстве, убачыла мяне і напісала оперупаўнаважанаму, што я падобны да таго злачынца. Оперупаўнаважаны потым праз вайбер адпраўляў ёй і яе сяброўцы, сведцы, мае фота і фота "падазроных" асобаў з нашага раёна, і ў перапісцы яму адказвалі — падобны ці не падобны. Вось пра мяне пацярпелая напісала, што "падобны" — гэтага было дастаткова, каб да мяне прыйшлі з АМАПам, які на альпінісцкім рыштунку забраўся на дзявяты паверх! Оперупаўнаважаны яшчэ тлумачыў, што я фізічна развіты і катаюся на ровары па лесапаркавай зоне. На апазнанні пацярпелая і сведка заявілі, што я не падобны да таго хулігана, але нават пасля гэтага мяне не адразу адпусцілі", — распавядае доктар.

Цяпер пацярпелы хоча, каб яго сям'і кампенсавалі матэрыяльную і маральную шкоду і публічна папрасілі прабачэння на сайце МУС. Матэрыяльную шкоду з улікам рамонту ў кватэры і грошай, выдаткаваных на лячэнне, ён ацэньвае прыкладза ў 2 тысячы рублёў. Суму маральнай шкоды мужчына пакуль не агучвае.