Стывен Сігал атрымаў даручэнне МЗС Расіі — стаў пасланнікам добрай волі
Амерыканскі акцёр Стывен Сігал атрымаў даручэнне МЗС Расіі — ён стаў пасланнікам добрай волі ў пытанні ўмацавання расійска-амерыканскіх сувязяў. Раней артыст атрымаў расійскае грамадзянства, нагадвае ВВС.
У расійскім МЗС адзначаюць, што функцыі Сігала можна параўнаць з задачамі пасланнікаў добрай волі ААН, калі “народная дыпламатыя сустракаецца з дыпламатыяй традыцыйнай”.
Тым часам былы амбасадар ЗША ў Расіі Майкл Макфол адрэагаваў на гэтае прызначэнне твітам, у якім назваў крок МЗС адным словам — “адчай”.
Апроч расійскага грамадзянства Стывен Сігал атрымаў таксама пашпарт Сербіі і яшчэ некалькіх краінаў. Росквіт кар’еры гэтага актора прыпаў на 1980-я гады, калі ён здымаўся ў баевіках і паказваў сваё валоданне прыёмамі ўсходніх адзінаборстваў. Пазней яго неаднаразова вылучалі на “Залатую маліну” — антыпрэмію за найгоршыя дасягненні ў кіно.
