Статкевіча пасадзілі пад арышт, тэрмін выканання якога скончыўся
![Статкевіча пасадзілі пад арышт, тэрмін выканання якога скончыўся](/sites/default/files/styles/gallery_main/public/2023-08/statkevich_erb_2.jpg.webp?itok=8UJjfGKn)
Апазіцыйнага лідара Міколу Статкевіча пасадзілі на Акрэсціна, хоць тэрмін выканання пакарання для яго ўжо скончыўся. Пра гэта паведамляе жонка палітыка Марына Адамовіч.
Яна звярнулася ў Цэнтр ізаляцыі правапарушальнікаў, дзе ёй паведамілі, што Статкевіч адбывае адміністратыўнае пакаранне паводле рашэння суда, вынесенага аж у траўні. Гаворка ішла пра акцыю на 1 траўня, перад якой палітыка прэвентыўна затрымалі.
Марына Адамовіч адзначае, што паводле заканадаўства тэрмін на выкананне такога пакарання складае два месяцы — то бок, Міколу Статкевіча павінны былі арыштаваць не пазней як у ліпені, а цяпер тэрмін скончыўся. Тым не менш ён змешчаны ў ізалятар.
Нагадаем, што экс-кандыдата ў прэзідэнта і старшыню Рады Беларускага нацыянальнага кангрэсу Міколу Статкевіча затрымалі 26 жніўня каля 12.00, калі ён выйшаў з дома на сустрэчу. Марына Адамовіч звязвае гэтае затрыманне з акцыяй пратэсту, якую апазіцыя мяркуе зладзіць у Мінску 8 верасня.