Вы тут

Спадзяюся, маё здароўе мацней, чым думаў — прыйшоў ліст ад Анджэя Пачобута

Анджэй Пачобут / baj.by

З'явілася інфармацыя аб стане здароўя журналіста і актывіста незарэгістраванага Саюза палякаў Беларусі Анджэя Пачобута. Яго затрымалі ў сакавіку па так званай "польскай справе".

У зняволенні Пачобут захварэў на каранавірус. Да 8 ліпеня ён знаходзіўся на каранціне ў Жодзінскім СІЗА. Хвароба працякала цяжка, пра гэта родныя даведаліся, калі ў актывіста нарэшце скончыўся каранцін і ад яго сталі прыходзіць лісты. Цяпер ён адчувае сябе добра, наступстваў няма, паведамляе падрабязнасці "Радыё Свабода".

"Сэрца пакуль, дзякуй Богу, працуе ў нармальным рэжыме. Спадзяюся, што маё здароўе мацней, чым я лічыў", — піша Анджэй.

Ён не губляе бадзёрасці, але чакае восень і дажджы. Летам у камеры вельмі душна. Тым не менш ён імкнецца даваць сабе фізічную нагрузку — робіць практыкаванне і шмат ходзіць.

"Я сабе выдумаў так: кожны крок — гэта крок у напрамку Гродна. Гэта вельмі матывуе", — распавядае Пачобут.

Ён не ведае, калі адбудзецца суд. Цяпер ідзе падрыхтоўка. Па словах журналіста, "справа рухаецца паволі", але ён не перажывае. Бо "ў турме ты толькі пасажыр, які едзе ці, правільней сказаць, якога вязуць, і твой ўплыў на кірунак, у якім ты рухаешся, вельмі абмежавана".

Яшчэ ён нагадаў родным старую байку пра Канстанціна Ракасоўскага і Сталіна. У 1937-м будучы маршал апынуўся ў турме, а ў сакавіку 1940-га яго выпусцілі. І вось калі пасля выхаду з турмы з Ракасоўскім сустрэўся Сталін, то "правадыр пралетарыяту, не міргнуўшы вокам, спытаў: "А дзе вы так доўга знікалі?". Ракасоўскі адказаў: "У турме сядзеў, таварыш Сталін". "Ну вы і знайшлі час у турме сядзець", — адказаў Сталін".

Пачобут піша пра тое, што трэба быць цвёрдым і "жыць перакананнем, што час ідзе і затрымаць яго ніхто не можа. Усё пройдзе, і гэта таксама".

Анджэю Пачобуту пагражае да 12 гадоў калоніі. Супраць яго і яшчэ шэрагу актывістаў Генеральная пракуратура завяла справу "за распальванне рэлігійнай і нацыянальнай варожасці" (частка 3 артыкула 130 КК). Частку фігурантаў гэтай справы затым вывезлі ў Польшчу, перад гэтым іх папрасілі падпісаць дакумент, згодна з якім яны не змогуць вярнуцца ў Беларусь. Па словах дырэктара тэлеканала "Белсат" Агнешкі Рамашэўскай, такі дакумент прапаноўвалі падпісаць яшчэ дваім фігурантам "польскай справы" , але яны адмовіліся. Як мяркуецца, гаворка ідзе пра Анджэя Пачобута і кіраўніцу Саюза палякаў Анжаліку Борыс.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.