СБУ "не мае намераў каментаваць словы чалавека, які называе сябе прэзідэнтам"

Радыё Свабода папрасіла прэс-службу СБУ пракаментаваць сённяшнія заявы Аляксандра Лукашэнкі пра дачыненне Украіны да дыверсіі ў Мачулішчах пад Мінскам. "Служба бяспекі Украіны не мае намераў каментаваць словы чалавека, які называе сябе прэзідэнтам Беларусі, — адказалі ў прэс-службе СБУ. — Што ж датычыць любых выпадкаў "бавоўны", то пра яе мы зможам дэтальна пагаварыць пасля нашай перамогі".

Ва Украіне "бавоўнай" называюць выбухі і пажары, якія адбываюцца на часова акупаваных Расіяй тэрыторыях і ў самой РФ. Цяпер гэтае слова нефармальна абазначае "выбух".

У аўторак Лукашэнка ўпершыню прызнаў факт дыверсіі ў Мачулішчах (назваў яе "спробай тэракту") і пашкоджанне расійскага самалёта А-50. Ён усклаў адказнасць за яе на Украіну (на СБУ) — нібыта быў затрыманы "ўкраінскі тэрарыст" і яго беларускія памочнікі. Аднак ніякіх доказаў гэтай версіі пакуль не было прадастаўлена.

BYPOL сцвярджаў, што раніцай 26 лютага на аэрадроме ў Мачулішчах беларускімі партызанамі з дапамогай двух дронаў і выбухоўкі быў пашкоджаны расійскі самалёт далёкага радыёлакацыйнага выяўлення і кіравання А-50. Выканаўцы нібыта змаглі пакінуць РБ. Было апублікавана спачатку відэа аэраразведкі ў Мачулішчах, а пасля і атакі. 

У апошні тыдзень у Беларусі былі затрыманыя дзясяткі чалавек, якіх правяралі на датычнасць да дыверсіі. Асабліва шмат было затрыманых у вёсках каля Мачулішчаў.