Санкцыі ідуць на спад: выправіць гэта прызнанне Беларусі спонсарам тэрарызму
![Заходнія краіны пачынаюць пераасэнсоўваць санкцыі / калаж Улада Рубанава, Еўрарадыё ](/sites/default/files/styles/gallery_main/public/2023-08/199.jpg.webp?itok=3Kq06xUI)
Заходнія краіны пачынаюць пераасэнсоўваць санкцыі / калаж Улада Рубанава, Еўрарадыё
Беларусь і Расію варта прызнаць дзяржавамі — спонсарамі тэрарызму, таму што толькі гэта дазволіць санкцыям быць эфектыўнымі. А санкцыйнае пытанне нашмат важнейшае за планы рэформаў, бо ў найбліжэйшы час змены рэжымаў у Беларусі і Расіі не прадбачыцца.
Такое меркаванне выказаў расійскі эканаміст, дырэктар Цэнтра даследаванняў постіндустрыяльнага грамадства Уладзіслаў Іназемцаў у часе "Форуму дэмакратычных сіл", які праходзіць у Берліне.
Санкцыі працуюць, але недастаткова
Санкцыі супраць Беларусі падрываюць рэжым, але ў той жа час яны недастатковыя, мяркуе эксперт.
![Санкции идут на спад: исправит это признание Беларуси спонсором терроризма](/sites/default/files/styles/round_photo/public/paragraphs/round_photo/1_0.jpg.webp?itok=CctiGTV6)
— Прычым недастатковыя не з пункту гледжання таго, што Еўропа ці Захад не хочуць купляць у Беларусі, а ў тым кантэксце, што гандаль з Беларуссю захоўваецца. Ва ўмовах санкцый супраць Расіі Беларусь будзе выступаць транзітным каналам для атрымання і Расіяй санкцыйнай прадукцыі, — кажа Уладзіслаў Іназемцаў.
Улады і бізнесы ўсё адно знойдуць абыходныя шляхі для экспарту або перапродажу еўрапейскіх тавараў у Расію. Тым больш рэжым Лукашэнкі ў гэтым даўно практыкуецца. Нашмат важней абмежаваць імпарт з заходніх краін, як гэта адбылося, напрыклад, з мікрачыпамі. Экспарт, які прыносіць рэжыму прыбытак, не такі важны.
![Санкции идут на спад: исправит это признание Беларуси спонсором терроризма](/sites/default/files/styles/default_image_paragraph_watermark/public/paragraphs/image/2_144.jpg.webp?itok=3DMzLqWS)
Беларускія эканамісты ўжо прапанавалі шэраг праектаў рэформаў для новай Беларусі, аднак гаварыць пра іх заўчасна, перакананы Уладзіслаў Іназемцаў. Бо пакуль няма падстаў думаць, што рэжымы ў Беларусі і Расіі хутка падуць.
— Адзінае пытанне заключаецца ў тым, якім можа быць у будучыні месца Беларусі ў эканоміцы рэгіёна Усходняй Еўропы. Цяпер гэта ўжо не вельмі актуальна, але год таму было рэальным і самым добрым варыянтам пазіцыянаванне Беларусі як дзяржавы, якая знаходзіцца на скрыжаванні еўрапейскіх транзітных шляхоў.
У гэтым выпадку ў Беларусі павінны быць добрыя адносіны і з Расіяй, і з Захадам.
— Беларусь як частка Саюзнай дзяржавы магла б стаць апорным пунктам для пранікнення еўрапейскага капіталу, еўрапейскіх інвестыцый у Расію і тавараў у тым ліку.
Цяпер усё змянілася. Мы не ведаем, якімі будуць наступствы вайны ва Украіне. Мяркую, што Расія пацярпіць паразу. Гэта прывядзе да яшчэ большай закрытасці Расіі. І ў гэтым дачыненні перавага Беларусі як магчымага транзітнага моста закрыецца.
Гэта моцна абмяжуе развіццё Беларусі, і такая сітуацыя замарозіцца на гады, адзначае эксперт. Змяніць гэта можа толькі падзенне рэжыму.
![Санкции идут на спад: исправит это признание Беларуси спонсором терроризма](/sites/default/files/styles/default_image_paragraph_watermark/public/paragraphs/image/3_112.jpg.webp?itok=1-hlFoZn)
Паколькі рэформы пакуль можна разглядаць выключна як інтэлектуальныя практыкаванні, трэба засяродзіцца на санкцыях, мяркуе эксперт. Бо заходнія краіны ўжо пачалі пераасэнсоўваць іх і ў некаторых выпадках адкатваць назад.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.