Руднік пра тое, калі ў прыярытэце дэмсілаў стануць беларусы ў Беларусі

Сувязь беларускіх дэмсілаў з дыяспарамі за мяжой больш відавочная, чым з беларусамі, што засталіся ў краіне, лічыць паліталагіня Леся Руднік.

— Усе мы назіраем гэтую адарванасць. Мы чытаем навіны, слухаем, што кажуць людзі пра тое, што адбываецца ў краіне, але не адчуваем гэтага на сваёй скуры.

І гэта адарванасць ілюструецца тым, якія палітычныя ініцыятывы сёння ўзнікаюць. Гэтую сувязь важна не згубіць.

Руднік прапануе выбраць адносна бяспечны накірунак працы, рухацца па якім можна і не пакідаючы краіны. Напрыклад, нацыянальнае адраджэнне.

— І па розных кірунках трэба знаходзіць сувязі ўнутры краіны. Людзі дагэтуль адпраўляюць інфармацыю ў бот “Гаюна”, дагэтуль рызыкаюць сваім жыццём і робяць нейкія крокі да таго, каб актыўна прымаць удзел у набліжэнні да перамогі. І калі дэмсілы паставяць сябе мэтай захоўваць гэтую сувязь, рабіць нейкія крокі, каб выбудоўваць каналы інфармацыі, я думаю, гэтага дасягнуць магчыма.

Пытанне прыярытэтаў. Наколькі гэта верагодна, улічваючы, што цяпер, відавочна, у прыярытэце стаіць развіццё сілавога блоку, падтрымкі сувязей з Украінай, вобраз беларусаў за мяжой і, кропкава, вырашэнне пытанняў з легалізацыяй.

Алеся Руднік зазначае, што дэмсілы паказалі добрую працу ў сацсетках і крэатыў, таму яна спадзяецца, што яны змогуць знайсці адпаведны напрамак супрацы з беларусамі ў Беларусі.