У КДБ адмаўляюцца браць перадачы для Някляева
У прыёмным пакоі следчага ізалятара КДБ адмаўляюцца прыняць перадачу для Ўладзіміра Някляева, якую яму сёння прынесла жонка Вольга.
Пра гэта яна распавяла Еўрарадыё.
Вольга Някляева: “З перадачай у нас тут узніклі праблемы.
Адразу адмовілі, сказалі, што “не паложана”. Я датэлефанавалася да
следчага — ён сказаў, што трэба яшчэ раз падыйсці ў прыёмны пакой і
першай неабходнасці рэчы яны павінны ўзяць. І што я павінна настойваць.
Яны адфутбольваюць мяне ад аднаго да другога. Зараз я пайду
разбірацца”.
Па словах Вольгі, ні яна, ні адвакат Тамара Сідарэнка да
гэтага часу не мелі сустрэчы з экс-кандыдатам у прэзідэнты Ўладзімірам
Някляевым. Але, кажа, зараз адвакат знаходзіцца на прыёме ў следчага,
які вядзе справу арыштаванага палітыка.
