У Гродне — чарговы штраф на 4,5 мільёна рублёў
Такі прысуд вынеслі грамадскаму актывісту Эдварду Дмухоўскаму, абвінаваціўшы ва ўдзеле ў несанкцыяваным пікеце.
У каментары Радыё "Свабода" Дмухоўскі адзначыў, што не ўдзельнічаў у акцыі, а праходзіў побач і заўважыў, як людзі ў цывільным цягнуць у аўтобус яго сябра Ігара Банцара. Тады арыштавалі і самога Дмухоўскага.
Яго справу разглядалі 6 чэрвеня. Але суддзя не вынесла рашэння, бо на прадстаўленым міліцыянтамі відэазапісе Дмухоўскага не было. 7 чэрвеня суддзя Наталля Козел, зачытваючы рашэнне, спаслалася толькі на сведчанні міліцыянтаў і на гэтай падставе вынесла прысуд.
Нагадаем, што несанкцыяваны пікет супраць русіфікацыі школы №36 з польскай мовай навучання адбыўся ў Гродне 1 чэрвеня. На акцыі былі затрыманыя каля 20 чалавек. Восем з іх ужо асудзілі. Ігар Банцар атрымаў 13 сутак арышту, астатнія штрафаваныя ад аднаго да пяці мільёнаў.
Фота — svaboda.org