Някляеў абяцае прадаць Маскве трубаправоды і нафтаперапрацоўчыя заводы

“Расійскі вектар” для прэзідэнта Някляева будзе прыярытэтным у яго знешняй палітыцы. Паводле словаў лідара кампаніі “Гавары праўду!”, ніводная дамова з Расіяй, падпісаная сённяшнімі ўладамі Беларусі, не будзе скасаваная. Але ўсе яны будуць перагледжаныя і ўпарадкаваныя. Пра гэта прэтэндэнт у прэзідэнты Ўладзімір Някляеў заявіў на сустрэчы з замежнымі журналістамі.

Уладзімір Някляеў: “Мы прааналізавалі ўсё тое, што паназаключаў Лукашэнка за гэтыя 16 гадоў з рознымі кіраўнікамі Расіі. Тут выдзяляюцца два блокі: дамоўленасці па СНД і па саюзе Беларусь-Расія. Калі вылучыць з балбатні і смецця нешта істотнае, то апынецца, што гэтага істотнага там не так ужо і шмат. Але ёсць і вельмі важнае, што ні ў якім разе нельга выкінуць і адрынуць”.



З таго, што застанецца, Някляеў і яго каманда сфармуе “канцэпцыю адказнага суседства”, у адпаведнасці з якой і будуць будавацца адносіны з усходнім суседам. На базе суседства будуць стварацца новыя дамоўленасці. Найперш, у галіне эканомікі. Бо, на думку Ўладзіміра Някляева, Беларусі жыццёва неабходныя інвестыцыі. І не важна, адкуль яны прыйдуць: грошы нацыянальнасці не маюць.

Уладзімір Някляеў: “А вось што яму (расійскаму капіталу — ЕРБ) тут рабіць — неабходна дакладна вызначыцца. Расійскі капітал павінен набываць і забіраць тое, што і так з’яўляецца калі не расійскім, то амаль што расійскім. І што, па вялікім рахунку, нікому акрамя Расіі і не патрэбна. Да прыкладу, трубаправоды. Гэтыя трубы, якія ляжаць дзесяцігоддзямі ў зямлі, патрабуюць рэканструкцыі, рамонту, вялізных капіталаўкладанняў, якіх Беларусь не мае. І нафтаперапрацоўчыя заводы, якія і так працуюць на расійскай сыравіне. Калі яны стануць ўласнікамі, з расіянамі лягчэй стане рэгуляваць тыя пытанні, якія сёння амаль не вырашальныя”.

Будуць прадаваць расіянам някляеўцы і іншыя прадпрыемствы — праўда, пры ўмове іх мадэрнізацыі. Бо мадэрнізаванае прадпрыемства будзе гарантавана функцыянаваць і забяспечваць працай беларусаў.



Не будзе ўрад Някляева ў аднабаковым парадку пераглядаць і існуючыя ваенныя дамовы з Расіяй. Да прыкладу, у дачыненні да расійскай базы ракет тактычнага прызначэння. Але ваенная дактрына патэнцыйнага кандыдата на пасаду прэзідэнта не прадугледжвае іх наяўнасці на нашай тэрыторыі. У будучыні.

Уладзімір Някляеў: “Я думаю, што ў перспектыве ракеты будуць выведзеныя. Бо Беларусь ужо даўно аб’явіла сябе нейтральнай дзяржавай. І гэтая стратэгія развіцця Беларусі не стыкуецца з тактыкай прысутнасці тактычных ракет”.



Да абмеркавання гэтага пытання далучыўся і кіраўнік выбарчага штаба Някляева Андрэй Дзмітрыеў. Яго каментар ледзь не выклікаў першы палітычны крызіс у камандзе прэтэндэнта.

Андрэй Дзмітрыеў: “Гэтае рашэнне вельмі складанае. Да таго ж, што вельмі важна, — у Беларусі Някляева вырашаць усё будзе не Някляеў”.

Уладзімір Някляеў: “Я не зразумеў!”

Андрэй Дзмітрыеў: “Выбачайце, Уладзімір Пракоф'евіч! Мы ж кажам пра сур’ёзную канстытуцыйную рэформу, у нас будзе парламент. І такія пытанні мусіць разглядаць не прэзідэнт — такія пытанні павінен разглядаць парламент, абраны народам”.



А вось “заходні вектар” сваёй знешняй палітыкі Ўладзімір Някляеў закрануў не так грунтоўна, як усходні. Праўда, кажа, толькі з-за таго, што наладжваць адносіны з Захадам Беларусі давядзецца фактычна з нуля.

Уладзімір Някляеў: “Гэты вектар нам, па сутнасці, давядзецца маляваць з першай рысачкі. Мы будзем супрацоўнічаць з ЕС вельмі актыўна. Бо менавіта з ЕС, з Захаду, мы, як і Расія, можам атрымаць тое, на што разлічваем, — найперш, нанатэхналогіі”.

Паводле словаў Уладзіміра Някляева, будзе рабіцца ўсё дзеля таго, каб вярнуць Беларусь у Савет Еўропы, Парламенцкую асамблею, АБСЕ. Але найперш, сказаў Андрэй Дзмітрыеў, будзе падпісаная дамова аб партнёрстве з ЕС, а для еўрапейцаў зробленыя бясплатныя візы.

Фота: Змітра Лукашука