Еўрасаюз на год працягнуў санкцыі супраць беларускіх чыноўнікаў

Замежныя міністры краін Еўрасаюза на пасяджэнні ў Люксембургу прынялі заключэнне па Беларусі.

"Савет не можа зняць абмежавальныя захады ў дачыненні да чыноўнікаў і вырашае падоўжыць іх дзеянне да 31 кастрычніка 2011 года. Аднак з тым, каб натхніць прагрэс у вызначаных ЕС сферах, Савет вырашае ў той самы час падоўжыць замарожванне візавых санкцый да той самай даты", гаворыцца ў заключэнні.

Разам з тым гаворыцца, што Савет міністраў можа зняць абмежаванні ў любы час, "у святле прагрэсу ў сферах дэмакратыі і правоў чалавека".

У дакуменце адзначаецца, што Савет ЕС шкадуе пра адсутнасць прагрэсу ў вызначаных сферах. Ад Беларусі чакаюць далейшае рэфармаванне выбарчага заканадаўства, прагрэсу ў сферах свабоды выражэння і СМІ, свабоды сходаў і асацыяцый. Савет міністраў заклікае беларускія ўлады правесці прэзідэнцкія выбары ў адпаведнасці з міжнароднымі стандартамі і абвязкамі, узятымі ў рамках АБСЕ і ААН.

Калі ў Беларусі палепшыцца сітуацыя ў сферах дэмакратыі, правоў чалавека і вяршэнства права, то Еўрасаюз будзе гатовы падняць дагаворныя адносіны на больш высокі ўзровень, гаворыцца ў Заключэнні.

Што да кантактаў на ўзроўні людзей, то "Савет ЕС чакае ад Еўрапейскай Камісіі прапановаў для абмеркавання дырэктываў аб спрашчэнні візавага рэжыму і дамоваў аб рэадмісіі". Таксама працягнецца абмеркаванне супольнага прамежкавага плана, каб устанавіць прыярытэты для рэформ.

Заключэнне называе і выгоды, якія можа атрымаць Беларусь."Еўрасаюз мог бы разгледзець прадстаўленне макра-эканамічнай дапамогі Беларусі, калі будуць выкананыя неабходныя перадумовы, уключна з заключэннем новай праграмы з МВФ", гаворыцца ў дакуменце.

Нагадаем, абмежаванні ў дачыненні да беларускіх чыноўнікаў уключаюць не толькі забарону на ўезд у краіны Еўрасаюза, але і замарозку іх банкаўскіх укладаў у еўрапейскіх банках.