Чаму на шоу “Я знаю!” на БТ дзеці баяцца пытанняў пра Беларусь

З 12 студзеня на канале “Беларусь 1” выходзіць другі сезон шоу “Я знаю!”. Гледачы заўважылі, што ўдзельнікі праграмы, школьнікі 5-11 класаў, як агню баяцца пытанняў пра Беларусь. І калі адно з 16 пытанняў складзенае па тэме “Беларуская літаратура”, менавіта яно застанецца апошнім.

У трэд прыйшоў адзін з аўтараў пытанняў Ілля Мітраховіч. Хлопец вырашыў патлумачыць гледачам, што як з праграмай, і пачаў уласны трэд з фактамі пра “Я знаю!”. Новыя факты будуць з’яўляцца пасля выхаду ў эфір новых эпізодаў шоў.

Вось самае цікавае на гэты момант:

“Каб зразумець узровень праблемы вось прыклад пытання: “Хто аўтар [верша] "Трэба дома бываць часцей"?” Мы нават прывялі чатыры радкі. Гэта трэці этап, заставаліся чатыры удзельнікі. Адказы: Купала, Колас. Астатнія маўчаць. Адказы настаўнікаў — Багушэвіч, Багдановіч. Толькі з падказкай — Барадулін”.

Дзеці блытаюць мастакоў Хаіма Суціна і Міхаіла Савіцкага. А яшчэ Станіслава Аўгуста і Жыгімонта Аўгуста.

“А вось гэта я хвілін пяць не мог зразумець... Дайшло толькі тады, калі ўспомніў, што гісторыю Беларусі выкладаюць на рускай... І [Жыгімонт] гэта не Жыгімонт [у іх уяўленні], а Сігізмунд”.

Часам беларускія школьнікі блытаюцца не толькі ў роднай літаратуры і гісторыі, але і ў рускай.

“Была прыведзеная змененая цытата з гогалеўскага “Рэвізора”, і трэба было, каб дзеці вызначылі памылку маўлення. Адзін з хлопцаў сказаў : "Памылка ў тым, што Рэвізор напісаў Пушкін, а не Гогаль"”.

Блытаюць не толькі пісьменнікаў і палітыкаў.

“На лагатып “Славянскага базара” дзеці адказвалі што гэта лагатып “Дажынак”, Радаўніцы і Дзядоў. Менавіта ў такім парадку. Калі хто ведае лагатып Радаўніцы ці Дзядоў, дашліце, калі ласка”.

Пытанні на шоу “Я знаю!” можна задаваць любыя. Ну, амаль. Напрыклад, пытанне пра калорыі знялі з праграмы з нагоды таго, што слова "калорыя" не згадваецца ў падручніках 10-га класа. Выкраслілі і пытанне пра загадку “Каб не бабіна махнушка, змерзла б дзедава калатушка”. Народнага гумару не зразумелі.

Больш фактаў — у профілі Іллі Мітраховіча.

Пасля таго, як гэты тэкст пабачыў свет, з Еўрарадыё звязаліся прадстаўнікі прэс-службы Белтэлерадыёкампаніі. Па іх звестках, Ілля Мітраховіч не з'яўляецца рэдактарам шоу "Я знаю!", не піша і ніколі не пісаў для яе пытанні. "Яго не звязваюць з Белтэлерадыёкампаніяй ніякія працоўныя і дамоўныя адносіны", — дадалі ў каментары, асобна падкрэсліўшы, што не ведаюць, адкуль Ілля ўзяў дэталі аб "ўнутранай кухні" праграмы.