Расіянін вёз праз Беларусь у Польшчу 600 патронаў

Польскія памежнікі ў пункце пропуску "Баброўнікі" на мяжы з Беларуссю звярнулі ўвагу на грамадзяніна Расіі. Ён падаўся ім падазроным, і яго адправілі на дадатковы кантроль.

Мужчына чачэнскай нацыянальнасці з расійскім пашпартам ехаў рэйсавым аўтобусам "Мінск — Варшава". Беларускую мяжу ён прайшоў, а польскія памежнікі звярнулі ўвагу на вялікую колькасць пячатак з міжнародных аэрапортаў у пашпарце расіяніна. Пры дадатковым кантролі ў мужчыны выявілі 600 патронаў ва ўпакоўках і без. Як паведамляе прэс-служба польскіх памежнікаў, кантрабандыст схаваў патроны ў відэамагнітафон.

Парушальніка затрымалі. Суд у Беластоку пастанавіў арыштаваць яго на тры месяцы. Увогуле ж за парушэнне закону расіяніну пагражае да 8 гадоў пазбаўлення волі.

Фота — podlaski.strazgraniczna.pl