Прэзентацыя на Еўрарадыё: сінгл “Finka” ад Harotnicy

Дэструктыўны пажарны аркестр Harotnica працягвае выпрабоўваць нервовую сістэму слухача. Летась калектыў прадставіў суіцыдальны твор “Na krai”, цяпер жа прэзентуе не менш драматычную кампазіцыю “Finka”. У адрозненні ад папярэдняга сінгла, які амаль не выконвалася на жыва, песня “Finka” ўжо добра вядомая тым, хто наведвае канцэрты гурта Harotnica. Гэты трэк — своеасаблівы перадсмяротны маналог дзяўчыны, якая памірае з-за рэўнасці.

“На самой справе, пытанні жыцця і смерці заўсёды актуальныя, асабліва для нас. Ды і проста цікава ў гэтым капацца! — тлумачыць абраную тэматыку кампазіцый Андрусь Такінданг. — З аднаго боку, гэта такая наша змрочная жыццярадаснасць, а з другога — чаму б і не! Павінен быць і праект, які б размаўляў з людзьмі на табуяваныя тэмы. Таму мы вырашылі быць такімі “санітарамі лесу” і размаўляць на нязвыклыя тэмы, якія ў музыцы не так часта сустракаюцца. Гэта і змрочныя жарты, і падарожжа ў краіну падсвядомасці, і Цім Бэртан у музыцы”.

Падчас працы над запісам кампазіцыі, “Finka” атрымалася іншай “і па гуку, і па духу”.

“Мы нарэшце зрабілі яе такой, як нам самім хацелася, — распавядае вакалістка гурта Валерыя Валадзько. — Цяпер “Finka” гучыць у больш хуткім тэмпе ды стала іншай па гуку дзякуючы больш цяжкай гітары. Мы доўга ішлі менавіта да такога гучання і вельмі задаволеныя вынікам”.

Нагадаем, што цяпер гурт Harotnica працуе над запісам дэбютнага альбома і працягне выкладаць яго паступова — па сінглах. Усе кампазіцыі пласцінкі будуць кардынальна адрознівацца і па стылях, і па настроі ды будуць вельмі рознымі, як і самі ўдзельнікі каманды.

Апошнія навіны

Галоўнае

Выбар рэдакцыі