Прэзентацыя на Еўрарадыё: альбом “По морям” гурта “Всё Crazy”

Прэзентацыя на Еўрарадыё: альбом “По морям” гурта “Всё Crazy”

Сэлцік-панк-гурт “Всё Crazy” прэзентуе на Еўрарадыё альбом “По морям”. Другі паўнафарматнік складаецца з 10 трэкаў, аб’яднаных агульнай канцэпцыяй.

“Гэта дарога да мора, — тлумачыць канцэпцыю лідар гурта Антон “Сір” Сіроцін. — Мы, беларусы, пазбаўленыя мора. Таму мы такія крыху затарможаныя і ў пэўнай ступені прып*жджаныя. І ўсё гэта таму, што ў нас няма мора, яно нас не корміць, мы на моры не паміраем і гэтак далей. Таму альбом цалкам накіраваны на мора і, натуральна, на бухло, бо бухло — гэта наша ўнутранае мора!”

Запіс альбома гурт распачаў яшчэ ў 2013-м годзе, а скончыў студыйную працу толькі ў снежні 2015-га. Саўнд-прадзюсарамі альбома выступілі непасрэдна фронтмэн калектыву а таксама вядомы гукарэжысёр Сяргей Шлёма Лабандзіеўскі. У выніку музыкі рэкамендуюць “По морям” да праслухоўвання “асобам, якія не дасягнулі нічога, а таксама цяжарным і кормячым сабакам. Дыск добры, як для прыхільнікаў жанру, так і для неафітаў”, — рэзюмуюць удзельнікі “Всё Crazy”.

Папярэдні альбом гурта выйшаў на пачатку 2013 года і называўся “Телипыч”, па мянушцы сябра музыкаў, які праплаціў запіс. Новы дыск “Всё Crazy” выдалі ўжо сваімі сіламі і цалкам змянілі падыход да запісу.

“Вынік “Телипыча” нам не спадабаўся, — прызнаецца Сір. — Бо ён атрымаўся вельмі гладкім… такі, ні пра што, карацей. А гэты альбом ад папярэдніка адрозніваецца літаральна ўсім. І калі папярэднік быў вылізаны і стэрыльны, то гэты альбом брудны, як старая партовая прастытутка. Я маю на ўвазе агульнае гучанне і канцэпцыю”.

Да таго ж, каб прытрымлівацца абранай стылістыкі, “Всё Crazy” вырашылі пашырыць склад. Да класічнага складу інструментаў дадаліся валынка, баян, скрыпка ды мандаліна. Канцэртная прэзентацыя альбома адбудзецца ўжо сёння, 17 сакавіка ў клубе Beer&Wine на вечарыне, прысвечанай Дню святога Патрыка. Далей музыкі плануюць наведаць з новай праграмай Маладзечна, Гродна, Гомель і Кіеў.

Каб не адцягваць, “Всё Crazy” ўжо цяпер пачалі працу над новым матэрыялам, якога, па словах Сіра, хопіць яшчэ на тры альбомы. Пра пачатак запісу пакуль гаворкі не вядзецца.

Апошнія навіны

Галоўнае

Выбар рэдакцыі