Праспект Незалежнасці ў Мінску белы, бо яго пасыпалі шкоднай для абутку соллю
![Праспект Незалежнасці ў Мінску белы, бо яго пасыпалі шкоднай для абутку соллю](/sites/default/files/styles/gallery_main/public/2023-08/minsknezaleznasci0207-1.png.webp?itok=KZ8KfLD2)
З раніцы 7 лютага праспект Незалежнасці ў сталіцы і тратуары каля яго былі нязвыкла белага колеру. Як высветліла Еўрарадыё, гэта рэагент, якім пасыпаюць дарогу ад галалёду ― галіт. Пра гэта распавялі ў “Гаррамаўтадары”.
Супрацоўніца “Гаррамаўтадар”: “Усё як раней, ніякіх новых тэхналогій мы за ноч не прыдумалі. Гэта мінеральны канцэнтрат галіт, супрацьгалалёдны матэрыял. Нам яго пастаўляе "Беларуськалій"”.
У “Гаррамаўтадар” дадаюць, што матэрыял гэты не шкодны, а лабараторыя пры прадпрыемстве кожны месяц праводзіць яго даследаванні.
![Праспект Незалежнасці ў Мінску белы, бо яго пасыпалі шкоднай для абутку соллю](/sites/default/files/paragraphs/image/minsknezaleznasci0207-2.png)
Мінеральны канцэнтрат галіт ці па-просту ― тэхнічная соль складаецца з хларыду натрыю, звычайнай харчовай солі. Гэта адзін з самых танных сродкаў барацьбы з галалёдам.
Як высвятляем у майстраў па рамонце абутку, гэты галіт шкодны для ботаў. Рэагент раз’ядае скуру і абутак псуецца.
“Ён проста разбурае скуру. Ён уядаецца ўнутр і расслойвае матэрыял. З часам скура грубее і трэскаецца. Але ёсць адмысловыя сродкі ад солі і снегу, гэта дапамагае”, ― кажуць у цэнтры, які займаецца рамонтам абутку.