Польскія ўлады не плануюць зачыняць пераход Кукурыкі — Казловічы

Польскія ўлады не будуць зачыняць памежны пераход "Кукурыкі-Казловічы" на мяжы з Беларуссю. Пра гэта віцэ-міністр інфраструктуры польскага ўрада Рафал Вэбер заявіў на сустрэчы з прадстаўнікамі польскіх перавозчыкаў, піша slowopodlasia.pl.

Сустрэча адбылася 15 лютага. У ёй прынялі ўдзел прадстаўнікі Міністэрства інфраструктуры Рафал Вэбер, Рэната Рыхтэр і Славамір Півавар. Таксама на ёй прысутнічалі старшыня праўлення Нацыянальнай асацыяцыі перавозчыкаў у Бялай-Падлясцы Тадэвуш Гаёўнік і прадстаўнікі транспартных асацыяцый у Польшчы.

Сябра праўлення і казначэй Нацыянальнай асацыяцыі перавозчыкаў у Бялай-Падлясцы Марцін Патапчук паведаміў журналістам, што ўдзельнікі сустрэчы пачулі ясную заяву ад намесніка міністра, што пераход зачынены не будзе.

Раней польскі бок зачыніў Баброўнікі — Бераставіца на мяжы з Беларуссю. Гэта адбылося пасля таго, як у Беларусі быў асуджаны на 8 гадоў актывіст польскай меншасці Анджэй Пачобут. Таксама польскія чыноўнікі казалі, што мяжу з Беларуссю варта цалкам зачыніць.