Польшча закрывае пункт пропуску "Баброўнікі" на мяжы з Беларуссю. Санкцыі?
"Баброўнікі" / pap.pl
Польшча прыпыніць дзейнасць пункта пропуску "Баброўнікі" на мяжы з Беларуссю (з беларускага боку ён мяжуе з пунктам "Бераставіца"). Такое рашэнне пачне дзейнічаць з 12:00 10 лютага. Яго тлумачаць "меркаваннямі нацыянальнай бяспекі". Міністэрства ўнутраных спраў Польшчы не ўдакладняе, да якога тэрміну пункт пропуску не будзе дзейнічаць.
"Баброўнікі" — адзін з найбуйнейшых пунктаў пропуску на польска-беларускай мяжы. Гэта наўпроставая дарога на Беласток з Беларусі.
Такім чынам, з пятніцы будзе працаваць толькі адзін пункт пропуску на беларуска-польскай мяжы — "Тэрэспаль" ("Брэст").
Напярэдадні ў Гродне журналіст-палітвязень, актывіст польскай меншасці ў Беларусі Анджэй Пачобут быў асуджаны на 8 гадоў калоніі ўзмоцненага рэжыму. У сейме Польшчы прапаноўвалі ўвесці санкцыі за пераслед палякаў у РБ.
Z uwagi na ważny interes bezpieczeństwa państwa zdecydowałem o zawieszeniu do odwołania od 10 lutego br. od godz. 12:00 ruchu na polsko-białoruskim przejściu granicznym w Bobrownikach.
— Mariusz Kamiński (@Kaminski_M_) February 9, 2023
