Павел Вінаградаў ізноў знік
Сёння каля 10-й раніцы да турмы на вуліцы Акрэсціна ў Мінску сустрэць Паўла сабраліся блізкія і сябры актывіста, аднак Вінаградава не пабачылі.
Жонка, бацька, сябры і лідары апазыцыі не змаглі сустрэць Паўла. Да іх выйшаў турэмны ахоўнік і сказаў, што Паўла тут няма, яго некуды вывезлі а 8-й раніцы.
Мінулым разам у такой жа сытуацыі Паўла адвозілі ў РУУС Маскоўскага раёна Мінска, каб не дапусціць ягонай сустрэчы ля турэмнай брамы, таму і сёння блізкія ды сябры Вінаградава накіраваліся туды, паведамляе “Свабода”.
26-гадовы актывіст моладзевага крыла “Zмена” кампаніі “Гавары праўду” Павал Вінаградаў — адзін з фігурантаў крымінальнай справы аб масавых беспарадках у Менску 19 снежня 2010 года, быў асуджаны на чатыры гады калоніі ўзмоцненага рэжыму, вызвалены на падставе ўказу Аляксандра Лукашэнкі аб памілаванні. 9 кастрычніка ён быў асуджаны судом Маскоўскага раёну Менску на 15 сутак адміністрацыйнага арышту. Гэта ўжо 16 “суткі” Вінаградава.
