Пасля аварыі пад Дзяржынскам шпіталізавалі пяць чалавек, у тым ліку траіх дзяцей
Хуткая, ілюстрацыйнае фота / mag.103.by
У аварыі пад Дзяржынскам, пра якую расказвала Еўрарадыё, пацярпелі сем чалавек. Пра гэта паведамляе прэс-служба Мінздароўя.
Дваіх пацярпелых шпіталізавалі ў Мінскую абласную клінічную бальніцу (МАКБ), траіх дзяцей — у Мінскую абласную дзіцячую клінічную бальніцу. Яшчэ двух пацярпелых накіравалі на амбулаторнае лячэнне.
Адзін з пацыентаў, адпраўленых у МАКБ, знаходзіцца ў цяжкім стане ў аддзяленні анестэзіялогіі і рэанімацыі. Другі пацыент гэтай лякарні знаходзіцца ў аддзяленні траўматалогіі і артапедыі. Яго стан ацэньваецца як сярэдняй ступені цяжкасці.
Шпіталізаваныя дзеці ляжаць у аддзяленні хірургіі і неўралогіі. Іх стан ацэньваецца як сярэдняй ступені цяжкасці.
Як паведамляла Еўрарадыё, аўтамабіль "Аўдзі 100" у Дзяржынскім раёне сутыкнуўся з "Нісанам", які ехаў па галоўнай дарозе. У "Аўдзі" сярод пасажыраў было пяцёра дзяцей ва ўзросце ад паўтара да 16 гадоў.
