Пасля адмены спектакля "Ціль" у віцебскім тэатры пачалі звальняць акцёраў
Нацыянальны тэатр імя Якуба Коласа ў Віцебску / yandex.by
Акцёрам Віцебскага нацыянальнага акадэмічнага драмтэатра імя Якуба Коласа, занятым у спектаклі "Ціль", не падаўжаюць кантракты, паведаміў "Медыязоне" акцёр Арцём Герак, які выканаў адну з роляў у спектаклі.
Акцёру і яго калегам не патлумачылі прычыну, з якой з імі скасоўваюць кантракты. Прычыну адмены спектакля акцёрскаму складу таксама не растлумачылі.
Акрамя Герака з тэатра звальняюць акцёрак Анжэлу Баркоўскую і Юлію Крашэўскую. Наконт астатніх дакладнай інфармацыі пакуль няма.
Як паведамляла Еўрарадыё, прэм'ера спектакля "Ціль" пра адважнага правадыра галандскіх гёзаў, якія змагаліся супраць тыраніі, адбылася ў Нацыянальным акадэмічным драмтэатры Віцебска 21 лістапада. Адразу пасля прэм'еры пастаноўку знялі з паказаў. Дырэктара тэатра Аляксандра Старых спачатку выклікалі ў Мінск, пасля чаго звольнілі.
