Парывісты вецер прагназуюць у Беларусі ў суботу

У суботу, 4 красавіка, у Беларусі ўначы чакаецца пераменная воблачнасць, пераважна без ападкаў, паведамляе Белгідрамет.

Зранку і ўдзень будзе воблачна з праясненнямі, у многіх раёнах пройдуць невялікія дажджы, па паўночным захадзе магчымы мокры снег. Вецер прагназуецца заходні, паўднёва-заходні, уначы ўмераны, удзень парывісты, месцамі ў паўночна-заходніх раёнах — моцны парывісты, да 15-18 метраў за секунду.

Уначы тэрмометры пакажуць ад 3 градусаў марозу да 3 градусаў  цяпла, па поўдні і паўднёвым усходзе будзе не ніжэй за 4-6 градусаў са знакам "плюс". Удзень чакаецца 8-14 градусаў вышэй за нуль, па паўднёва-ўсходняй палове Беларусі паветра прагрэецца да +16 градусаў.

У нядзелю, 5 красавіка, уначы будзе воблачна з праясненнямі, удзень прагназуецца пераменная воблачнасць. Уначы на большай частцы тэрыторыі, удзень у асобных раёнах па паўночным усходзе краіны пройдуць кароткачасовыя ападкі (дождж, уначы магчымы мокры снег). Вецер чакаецца заходняй чвэрці парывісты, месцамі моцны парывісты.

Тэмпература паветра ўначы складзе -1...+5 градусаў. Удзень прагназуецца 8-15 градусаў цяпла, па захадзе будзе да +17 градусаў.