Парашэнка спыніў на тыдзень баявыя дзеянні на ўсходзе Украіны

Пра гэта прэзідэнт Украіны Пётр Парашэнка заявіў увечары 20 чэрвеня, перадае УНІАН.

Парашэнка ўдакладніў, што сілы антытэрарыстычнай аперацыі будуць весці баявыя дзеянні толькі ў адказ — гэта значыць калі баевікі будуць нападаць.

Ён таксама заявіў, што найбліжэйшым часам на ўсходзе Украіны пачнецца аднаўленне дамоў, пашкоджаных падчас баёў з тэрарыстамі. Усе працы па аднаўленні будуць весціся за кошт дзяржавы.

Нагадаем, што Парашэнка прапанаваў мірны план па спыненні канфлікту на тэрыторыі Данецкай і Луганскай абласцей. У прыватнасці, план прадугледжвае аднабаковае спыненне агню з боку ўкраінскіх вайскоўцаў. Пасля гэтага баевікі павінныя скласці зброю, вызваліць закладнікаў і захопленыя будынкі. Тыя, хто не здзяйсняў цяжкіх злачынстваў, трапляюць пад амністыю. Расійскім наёмнікам будзе дадзены калідор для вяртання на радзіму.

Фота — day.kiev.ua