У парадзіхі з Бабруйска, дзіця якой знайшлі ў кустах, двое дзяцей у інтэрнаце
![У парадзіхі з Бабруйска, дзіця якой знайшлі ў кустах, двое дзяцей у інтэрнаце](/sites/default/files/styles/gallery_main/public/2023-08/bab.jpg.webp?itok=t8qoN6C8)
Парадзіха з Бабруйска, дзіця якой знайшлі ў кустах, мае яшчэ дваіх дзяцей, але яе пазбавілі мацярынскіх правоў, піша TUT.by. Зараз Следчы камітэт праводзіць праверку па факце здарэння, якое адбылося 17 кастрычніка ў прыватным сектары на ўскраіне горада.
Нагадаем, што ў адзін з дамоў на выклік прыехала хуткая — медыкам паведамілі пра роды. Калі брыгада прыбыла, ім не адчынілі, аднак медыкі пачулі крык немаўляці і ўбачылі ў кустах на вуліцы распранутага нованароджанага хлопчыка. Яго адразу забралі ў шпіталь і аказалі яму неабходную дапамогу. Дзіця нарадзілася неданошаным і цяпер знаходзіцца ў стабільна цяжкім стане.
Маці знайшлі і таксама прывезлі ў радзільню. Вядома, што двое яе старэйшых дзяцей гадуюцца ў інтэрнаце. Сама жанчына жыла з грамадзянскім мужам, абодва выпівалі. Яна была на восьмым месяцы цяжарнасці. Мяркуецца, што ў дзень родаў паміж мужам і жонкай мог паўстаць канфлікт.