Памёр вядомы беларускі дысідэнт Валерый Сядоў

Памёр вядомы беларускі дысідэнт Валерый Сядоў. Здарылася гэта яшчэ 10 сакавіка. Яму было 64 гады. Прычынай смерці Сядова папярэдне называюць інфаркт, паведамляе "Наша ніва".

Валерый Сядоў нарадзіўся ў Грузіі, меў рускае паходжанне. Ён працаваў у Інстытуце філасофіі Акадэміі навук БССР. У канцы 1980-х падтрымаў беларускі адраджэнскі рух, быў актывістам БНФ "Адраджэнне". Восенню 1990 года на Сядова распачалі крымінальную справу. Падчас шматтысячнага антыкамуністычнага мітынгу ў Мінску ён залез на помнік Леніну перад Домам ураду і павесіў на яго целагрэйку зэка ГУЛАГу з крыжом, абматаным калючым дротам. За кратамі Сядоў правёў 70 дзён, больш за 30 з якіх галадаў.

У 2011 годзе Валерый Сядоў адбываў 12 сутак адміністрацыйнага арышту за ўдзел у акцыі ў падтрымку палітвязняў. З таго года жыў у Варшаве, вучыўся па праграме Каліноўскага ў дактарантуры ўніверсітэта Вышынскага. 5 сакавіка ў яго быў дзень народзінаў, праз 5 дзён яго не стала. Цяпер вырашаецца пытанне дастаўкі цела Сядова з Польшчы ў Беларусь.