Пакуль судзяць экаактывістку, Аргенціна пакутуе ад спёкі — #ІхНоравы

02/02/2024 - 13:06

Кароткі агляд міжнародных навін / @rubanau_collage

Вядомую экаактывістку Грэту Тунберг судзяць за яе акцыю ў Вялікабрытаніі. Адбываецца гэта на фоне чарговага наступства глабальнага пацяплення — моцнай спёкі ў Аргенціне. Пра гэта і не толькі — у нашым традыцыйным аглядзе міжнародных навін.

У Германіі страйкуюць кіроўцы аўтобусаў, трамваяў і метро

У Германіі амаль па ўсёй краіне праходзяць страйкі работнікаў гарадскога грамадскага транспарту. У іх удзельнічаюць кіроўцы аўтобусаў, трамваяў і машыністы метро. Страйк праходзіць на тэрыторыі ўсіх федэральных земляў, за выключэннем Баварыі.

Прафсаюз дабіваецца для 90 тысяч сваіх сябраў павышэння зарплаты на фоне росту інфляцыі ў Германіі і паляпшэння ўмоў працы. У Брандэнбургу страйкоўцы патрабуюць павышэння зарплаты на 20 працэнтаў, але не менш чым на 650 еўра за месяц. Акрамя грошай кіроўцы грамадскага транспарту дамагаюцца скарачэння працоўнага дня, павелічэння паўзаў паміж зменамі і больш працяглага адпачынку з адпаведнай фінансавай надбаўкай.

У прафсаюзе зазначаюць, што такія паляпшэнні зробяць працу кіроўцаў грамадскага транспарту ў Германіі больш прывабнай і дазволяць скараціць недахоп персаналу.

Аргенціну "плавіць" 40-градусная спякота

Пакуль судзяць экаактывістку, Аргенціна пакутуе ад спёкі — #ІхНоравы

Па ўсёй краіне абвешчаны чырвоны ўзровень небяспекі / Reuters

Аргенцінцы масава шукаюць цень і спрабуюць асвяжыцца ў фантанах праз пякельную спёку, якая ахапіла краіну. Пра гэта паведамляе Reuters.

Тэмпература ў Аргенціне падымаецца да невыносных +40 градусаў. Сотні людзей збіраюцца ля рэк і абліваюцца вадой, каб справіцца са спякотай, бо па ўсёй краіне абвешчаны чырвоны ўзровень небяспекі з прычыны высокіх тэмператур.

"Нават кандыцыянера недастаткова. Цяпло распаўсюджваецца з даху па доме, там проста немагчыма заставацца. Таму лепш за ўсё збегчы і пашукаць такое месца ля ракі, каб добра прабавіць час з сям'ёй", — гавораць мясцовыя жыхары.

У канцы студзеня невыносная спякота ахапіла і Аўстралію. Тэмпература ў некаторых раёнах краіны падымалася да +42... +47 °С. Такое надвор'е ўзмацняе рызыку новых маштабных лясных пажараў, як было ў 2019-2020 гадах. Тады ў Аўстраліі здарылася так званае "чорнае лета", калі лясныя пажары забралі жыцці 33 чалавек, 3 мільярдаў жывёл і трыльёнаў беспазваночных.

Судзяць Грэту Тунберг

У Вестмінстэрскім магістрацкім судзе Лондана пачаўся працэс супраць экалагічнай актывісткі Грэты Тунберг. Яе абвінавачваюць у парушэнні грамадскага парадку.

Грэта Тунберг / APF

У кастрычніку 2023 года Тунберг і яшчэ некалькі актывістаў былі затрыманыя падчас акцыі, прымеркаванай да сустрэчы Energy Intelligence Forum у Лондане з удзелам кіраўнікоў некалькіх сусветных нафтагазавых гігантаў. На думку паліцыі, пратэстоўцы парушылі грамадскі парадак, бо адмовіліся падпарадкавацца патрабаванню афіцэра перанесці акцыю ў іншае ўзгодненае месца.

У судзе Грэце Тунберг можа пагражаць штраф да 2500 фунтаў стэрлінгаў (2928 еўра).

Удзельнікі акцыі ў кастрычніку 2023 года, на якой затрымалі Грэту Тунберг, абвінавачвалі буйныя энергетычныя кампаніі ў сабатажы пераходу сусветнай энергетыкі на аднаўляльныя крыніцы энергіі з мэтай атрымання большага прыбытку.

"Свет патанае ў выкапнёвым паліве. Нашы надзеі, мары і жыцці змываюцца патокам прапаганды і хлусні. Дзесяцігоддзямі гэтыя кампаніі ўсведамлялі наступствы сваіх бізнес-мадэляў і тым не менш нічога не зрабілі. Мы не можам дазволіць гэтаму працягвацца", — заявіла тады Тунберг.

Брэд Піт здымецца ў апошнім фільме Квенціна Таранціна

Брэд Піт сыграе аднаго з персанажаў у наступнай карціне рэжысёра Квенціна Таранціна. Пра гэта паведамілі адразу некалькі профільных замежных выданняў.

Журналісты адзначылі, што не могуць дакладна сказаць, ці дасталася акцёру галоўная роля, але, магчыма, так і будзе. Хто яшчэ здымецца ў кінастужцы, невядома.

Для пастаноўшчыка і артыста гэта будзе ўжо трэцяе супрацоўніцтва — у мінулым яны разам папрацавалі над “Бясслаўнымі вырадкамі” і “Аднойчы ў… Галівудзе”.

Падзеі фільма, які мае стаць для Квенціна Таранціна апошнім, разгорнуцца ў Лос-Анджэлесе ў канцы 1970-х. У цэнтры яго сюжэта будзе чалавек, які піша калонку пра кіно для порначасопіса — гісторыя заснаваная на рэальных падзеях.

Дата рэлізу “Кінакрытыка” не ўдакладняецца. Калі пачнуцца здымкі, таксама незразумела: пакуль што за праектам не замацаваная ні адна студыя, але ў Deadline лічаць, што ім зоймецца Sony.

Apple анансавала з'яўленне сёлета сваёй самай чаканай функцыі

Генеральны дырэктар Apple Цім Кук падчас канферэнц-кола з інвестарамі пацвердзіў, што кампанія прадставіць новыя магчымасці на базе генератыўнага штучнага інтэлекту "пазней сёлета". Пра гэта паведамляе The Independent.

Гэтая заява пацвярджае інфармацыю пра маштабныя новаўвядзенні ў iOS 18. Выданне Bloomberg паведамляла, што ШІ стане цэнтральным новаўвядзеннем у наступнай аперацыйнай сістэме для iPhone, а само абнаўленне стане ледзь не найбуйнейшым у гісторыі Apple.

Як адзначалі крыніцы, ад iOS 18 і іншых АС Apple варта чакаць прынамсі наступных разумных магчымасцяў:

дапамога ў складанні паведамленняў у iMessage;
абноўленая Siri, якая зможа не толькі ставіць таймеры і паведамляць, якое надвор'е за акном, але і дапаможа ў працы;
новыя функцыі ІІ для Apple Music для стварэння "аўтаматычна згенераваных плэйлістоў";
можна таксама не сумнявацца, што шмат функцый атрымаюць камера і праграма галерэі.

Пры гэтым адзначаецца, што большая частка разумных функцый будзе задзейнічаная эксклюзіўна ў iPhone 16, а папярэднія мадэлі атрымаюць толькі некаторыя з новых магчымасцяў.