Падчас атакі на базу расійскага ВМФ у Наварасійску пашкоджаны карабель
Мяркуецца, што гэта вялікі дэсантны карабель "Аленегорскі гарняк" / Telegram
Падчас атакі ўкраінскіх марскіх безэкіпажных катэраў на базу расійскага ВМФ у Наварасійску пашкоджаны карабель. З'явілася фота і відэа, як яго, з моцным нахілам на бок, спрабуюць буксіраваць. Мяркуецца, што гэта вялікі дэсантны карабель "Аленегорскі гарняк".
Раней Мінабароны Расіі заявіла, што катэры былі своечасова заўважаныя і ліквідаваныя. Атрымліваецца, што гэта няпраўда.
Ваенна-марская база ў Наварасійску была атакавана ў ноч на 4 жніўня. Расійскі бок сцвярджаў, што пацярпелых і разбурэнняў няма. Аднак гэта была чарговая спроба схаваць няўдачу. Насамрэч з пашкоджанага карабля тэрмінова давялося эвакуяваць экіпаж (каля 100 чалавек), а яго спрабаваць ратаваць ад затаплення.
Па некаторых даных, на надводным дроне было 450 кг трацілу. Карабель атрымаў сур'ёзную прабоіну і цяпер не можа выконваць свае баявыя задачы.
Мінабароны і Генштаб Украіны пакуль згаданую атаку не каментавалі.
