“Ніва шэўрале таксама пазадарожнік, але старшыня раёна адзін на раён!”
Кармянскі раён купляе аўтамабіль за 25 тысяч еўра, а Touareg, што быў у мінулым годзе, прапаў.
Райвыканкам купляе машыну за ўстаноўлены прэзідэнтам ліміт, тут пытанняў няма, усё па законе.
“Мы за ліміт не выходзім, нам дазволілі купляць такую машыну”, - пацвярджаюць Еўрарадыё ў Карме. З маркай будучай машыны яшчэ не вызначыліся. Будуць браць, што прапануюць.
“Нам патрэбен пазадарожнік, бо трэба ездзіць па раёне, бо ў раёне моцныя залевы, вы прыедзьце – я вам пакажу, якія залевы!”, - запрашае Еўрарадыё дзяржслужачы з райвыканкама.
Я губляюся, бо Ніва Шэўрале – гэта таксама пазадарожнік, але ўдвая танней…
“Ніва шэўрале таксама пазадарожнік, але ж гэта …старшыня раёна, і на раён ён адзін”, - не пагаджаюцца са мной у Карме.
Інфармацыя пра новыя закупкі аўтамабіляў мяне бянтэжыць, бо літаральна год назад ў гэтым жа Кармянскім райвыканкаме Еўрарадыё казалі, што яны купілі WV Touareg.
Прыкладна такі, з-за якога ў мінулым годзе аскандаліўся Ельскі райвыканкам.
“Вельмі стары аўтапарк, ніякай машыны не куплялі”, - коратка кідаюць у Карме. На праверку аказалася, што машына пра якую казалі ў мінулым годзе Еўрарадыё, і сапраўды недзе падзелася.
Дарэчы, праз год пасля скандалу Ельскі райвыканкам свой стары, на думку чыноўнікаў, аўтапарк ўсё ж такі збіраецца аднавіць. У дазволеным мінімуме.
Усяго ж, ад пачатку года чыноўнікі закупілі аўтамабіляў болей чым на 42 мільярды рублёў. Вось што значыць Год беражлівасці ў дзеянні.