Незалежнасць на мільёны: як чыноўнікі выдаткоўваюць грошы да 3 ліпеня

За гэтыя грошы яны хочуць убачыць салют у "колерах нацыянальнага сцяга" (так яны называюць чырвона-зялёнае палатно). Магчыма, для "натхнення" ўдзельнікаў дзяржзакупкі да дакументаў прыклалі архіў з кампазіцыяй беларускага кампазітара Леаніда Шырына, аўтара песень Алёны Ланской і Ірыны Дарафеевай.

У іншых гарадах піратэхнічныя апетыты чыноўнікаў сціплейшыя. Так, у Магілёве пад феерверк вылучаюць 18 тысяч рублёў, у Брэсце — 20 тысяч, а ў Скідзелі — каля 6,5 тысячы рублёў.

"Песняроў" — на АЭС

Свята не абыходзіцца і без маштабнага канцэрта — з такімі ж маштабнымі тратамі. Так, на матэрыяльна-тэхнічнае забеспячэнне канцэрта "Наша памяць мацнейшая за час" і акцыі "Спяем гімн разам" каля Стэлы ў сталіцы выдаткуюць 343 тысячы рублёў.

Канцэрты пройдуць па ўсёй краіне. Напрыклад, у Мастах закупляюць "выступ заслужанага артыста", якога — не ўдакладняюць, выканаўца павінен сам падаць заяўку. Абавязковая ўмова — "рэпертуар артыста павінен уключаць песні патрыятычнай накіраванасці". Плацяць 4,5 тысячы рублёў. Яшчэ дзве тысячы — на кавер-бэнд, які павінен выступаць не менш за гадзіну. І 1,5 тысячы рублёў зверху — на "шоу-праграму".

У "горадзе ядзершчыкаў" Астраўцы на выступы артыстаў выдаткоўваюць амаль 14 тысяч рублёў: 3,5 тысячы на "Песняроў", яшчэ 5000 на гурт "Беларусы". Плануюць запрашаць таксама кавер-бэнд "Бандиты" і лідскі аркестр. І дзевяць мажарэтак (барабаншчыц).

У Гомелі на сцэну да канцэрта трацяць больш за 40 тысяч рублёў — гэта без уліку выступаў артыстаў. У Магілёве — 37 тысяч рублёў. Сімптаматычна, што прыклады афармлення сцэны ў дакументах на закупку называюцца "izobrazhenie-viber".